Հայ դպրոցականների մշակած սումոիստ ռոբոտը երկրորդ տեղն է զբաղեցրել ԱՄՆ-ի «Ռոբոտների ազգային մարտահրավեր» մրցույթում
ԵՐԵՎԱՆ, 19 ապրիլի. /ԱՌԿԱ/. Հայ դպրոցականների մշակած սումոիստ ռոբոտը զբաղեցրել է երկրորդ տեղը և արժանացել «Honda Innovation Award» հեղինակավոր մրցանակին ԱՄՆ-ում անցկացվող «Ռոբոտիկայի ազգային մարտահրավեր» (National Robotics Challenge) հեղինակավոր մրցույթում, որը տեղի է ունեցել ապրիլի 7-ից 9-ը ԱՄՆ–ի Մարիոն քաղաքում:
Ավելի քան 1300 մասնակից և ավելի քան 400 ռոբոտ էին ներկայացված ՌԱՄ 2016-ին, որն այս տարի տոնում էր իր 30-ամյակը: Ամենամեծ թվով ռոբոտները ներկայացաված էին հենց «Սումո ռոբոտ» անվանակարգում:
Ինչպես նշեց հայկական թիմի անդամներից մեկը` «Այբ» դպրոցի 12-րդ դասարանի աշակերտ Ռաֆիկ Մովսիսյանը, սումո ռոբոտի նախագծման աշխատանքները սկսվել են սեպտեմբերին, իսկ փետրվարին թիմը սկսել է նրա շինարարության աշխատանքները: Արդյունքում, հայկական թիմի ռոբոտը մրցույթի միակ համաչափ ռոբոտն էր, ինչի շնորհիվ էլ թիմն արժանացավ Honda ընկերության «Լավագույն նորարարական լուծում» մրցանակին:
Նրա խոսքով, ռոբոտի նպատակն էր գտնել դաշտում հակառակորդին և արագ դուրս մղել նրան, ընդ որում, անիվների հատուկ կառուցվածքի շնորհիվ, ռոբոտը կարողանում է դաշտից հեռացնել նույնիսկ ավելի խոշոր և ծանր հակառակորդներին:
«Սակայն մրցույթի ընթացքում մաշված անիվները փոխելու ժամանակի պակասի պատճառով թիմը զբաղեցրեց միայն երկրորդ տեղը: Մեր ռոբոտը մասնակցել է 15-20 մարտերում և որոշ վնասվածքներ ունի: Այն վերանորոգման, վնասված սենսորների վերականգնման և ծրագրային որոշակի արդիականացման կարիք ունի», - ասել է Մովսիսյանը:
Ընդ որում, նա նշել է, որ թիմը մտադիր է հաշվի առնել մրցույթի ընթացքում բացահայտված բոլոր թերությունները, արդիականացնել դրանք և հաջորդ տարի մրցույթին ներկայացնել ավելի կատարյալ տարբերակ` մասնակցելով նաև այլ անվանակարգերում։
Նրա խոսքով, «Այբ» դպրոցի թիմն արդեն բազմիցս մասնակցել է ռոբոտների մրցույթներին, այդ թվում նաև` ԱՄՆ–ում անցկացված գծին հետևող ռոբոտների և հրշեջ ռոբոտների մրցույթներին, որտեղ ևս արժանացել է մրցանակների։
Ինչպես նշում է «Այբ» դպրոցի տնօրեն Արամ Փախչանյանը, սա ռոբոտիկայի թիմի առաջին նվաճումը չէ հայտնի միջազգային ռոբոտիկայի մրցույթներում։ Թիմն արդեն մասնակցել է տարբեր մրցույթների և գրավել տարբեր մրցանակային տեղեր:
«Բայց մենք յուրահատուկ նշանակություն ենք տալիս այս մրցույթին, քանի որ միանգամից կարողացանք արժանանալ ԱՄՆ-ում ռոբոտաշինության ոլորտում ամենահեղինակավոր և ամենահին մրցույթներից մեկի գլխավոր մրցանակներից մեկին: Այսպիսով, մենք մեզ համար սահմանեցինք նոր բարձր նշանաձող», - ասել է Փախչանյանը:
Նրա խոսքով, նման հաղթանակը հնարավոր դարձավ մի քանի կարևոր գործոնների շնորհիվ, որոնց թվում են «Այբ» դպրոցում դասավանդվող ռոբոտաշինության, ինժեներական տեխնոլոգիաներին վերաբերող առարկաները, դրանց նկատմամբ աշակերտների յուրահատուկ սիրը, ինչպես նաև ՎիվաՍել-ՄՏՍ ընկերության համակողմանի աջակցությունը, որը թիմին տրամադրեց ինչպես ֆինանսական, այնպես էլ կազմակերպչական և խորհրդատվական աջակցություն:
Իր հերթին ՎիվաՍել-ՄՏՍ-ի գլխավոր տնօրեն Ռալֆ Յիրիկյանը նշել է, որ ընկերությունը աջակցում է ռոբոտաշինության ոլորտի զարգացմանը 2011 թ.-ից, քանի որ հավատում է, որ ոլորտն ունի լայն հեռանկարներ և մեծ հնարավորություններ:
«Մենք համոզված ենք, որ Հայաստանի երիտասարդները կարող են ճանապարհ հարթել դեպի միջազգային հարթակներ, և ոչ միայն հաղթահարել առաջադրված ամենախիստ պահանջները, այլև սահմանել նոր չափանիշներ»,- նշել է Յիրիկյանը:
«Այբ»-ի ռոբոտիկայի խմբակը գործում է 2011 թվականից: «Այբ» դպրոցի ռոբոտիկայի լաբորատորիայի և դպրոցին կից բացված ֆաբլաբի (Մասաչուսեթսի տեխնոլոգիական ինստիտուտի ստեղծած արտադրական լաբորատորիայի) գլխավոր գործընկերն է ՎիվաՍել-ՄՏՍ ընկերությունը:
«Ռոբոտիկայի ազգային մարտահրավեր» մրցույթն առաջին անգամ անցկացվել է 1986 թ.-ին, այն աշխարհում ռոբոտաշինության ամենաերկարակյաց մրցույթն է, որը բաղկացած է 12 անվանակարգերից՝ սումո ռոբոտ, մինի-սումո ռոբոտ, փրկարար ռոբոտ, ռոբոտ հոկեյիստ, լաբիրինթոս անցնող ռոբոտ և այլն: Մրցույթին կարող են մասնակցել անհատներ կամ թիմեր տարրական, միջին, ավագ դպրոցներից և քոլեջներից: Մրցույթի գլխավոր հովանավորն է «Հոնդա» ընկերությունը: -0–
Ծանոթացեք լուրերին առաջինն ու քննարկեք դրանք մեր Telegram-ում
17:35 19.04.2016