Հայաստանյան «Ռոստելեկոմի» գլխավոր տնօրենը AIESEC-ի երիտասարդներին ներկայացրեց ընկերության հաջող կառավարման իր գաղտնիքները
ԵՐԵՎԱՆ, 27 հունիսի. /ԱՌԿԱ/. Հունիսի 23-25-ը Ծաղկաձոր քաղաքում AIESEC-ի կողմից կազմակերպված համաժողովի ընթացքում ելույթով հանդես եկավ «Ռոստելեկոմ» Հայաստանի գլխավոր տնօրեն Հայկ Ֆարամազյանը՝ երիտասարդներին ներկայացնելով ընկերության հաջող կառավարման գաղտնիքներն ու հեռահաղորդակցության ոլորտի զարգացումները ՀՀ-ում վերջին մի քանի տասնամյակների ընթացում, հաղորդում է ընկերության մամուլի ծառայությունը։
Մասնավորապես, անմիջական մթնոլորտում անցկացվող պրեզենտացիայի ժամանակ գլխավոր տնօրենն անդրադարձավ զարգացման հիմնական ուղղություններին, որոնք շատ կարևոր են յուրաքանչյուր ընկերության համար՝ բիզնեսի կառավարման, գնահատման ու զարգացման հիմնասյուներն են, անդրադարձ կատարեց հեռահաղորդակցության ոլորտի զարգացումներին ՀՀ-ում, տեխնոլոգիական նորույթներին։
«Այսօր ես որոշ փակագծեր բացեցի և ներկայացրեցի մեր ընկերության հաջողության բանալին հանդիսացող կարևոր ուղղությունները։ Համոզված եմ՝ այս երիտասարդներից շատերն ապագայում իրենք են նման հանդիպումներ ունենալու որպես ղեկավարներ։ Երիտասարդների համար շատ արժեքավոր են այն գիտելիքներն ու փորձը, որը կարող են փոխանցել նրանց փորձառու մենեջերները և դա միջազգայնորեն ընդունված գործընթաց է։ «Ռոստելեկոմը» տարիներ շարունակ համագործակցում է հայաստանյան AIESEC-ի հետ և շարունակելու ենք ակտիվ երիտասարդների կողքին լինել»,—նշեց «Ռոստելեկոմ» Հայաստանի գլխավոր տնօրեն Հայկ Ֆարամազյանը։
Մասնակիցների թվում էին երիտասարդ ուսանողներ Հայաստանից և արտերկրից, ովքեր հետաքրքրություն ցուցաբերեցին կառավարման ամենատարբեր ուղղությունների նկատմամբ՝ տեխնիկականից մինչև անձնակազմի համալրման սկզբունքներն ու կառավարման հիմնարար տարրերը։
AIESEC-ի համաժողովի հիմնական թեման Առաջնորդության ձևավորումն էր, ինչը Հայաստանում միավորել էր ավելի քան քառասուն տարբեր ազգության երիտասարդների մեկ գաղափարի շուրջ։
«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։
Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–
Ծանոթացեք լուրերին առաջինն ու քննարկեք դրանք մեր Telegram-ում
14:18 27.06.2017
