Հայտնի են տարվա ամենահզոր սմարթֆոնները
ԵՐԵՎԱՆ, 12 հունվարի. /ԱՌԿԱ/. Սմարթֆոնների համար սինթետիկ թեստի մշակմամբ զբաղցող AnTuTu ընկերությունը հրապարակել է 2016 թ.-ի ամենահզոր սմարթֆոնների ցուցակը: Ինչպես հաղորդում է Lenta.ru-ն, հետազոտությունների արդյունքները հրապարակվել են benchmark-ի կայքում:
Վարկանիշային աղյուսակի առաջին տեղը զբաղեցնում է iPhone 7 Plus-ը` 181 հազար միավորով: Երկրորդ տեղում է սովորական iPhone 7-ը (172 հազար միավորով), որն առաջինից տարբերվում է միայն օպերատիվ հիշողության ավելի փոքր ծավալով: Ամենաարդյունավետ սարքերի եռյակը եզրափակում է չինական OnePlus 3T-ն` 163 հազար միավորով:
Տասը լավագույն սմարթֆոնների ցուցակում ներառվել են նաև LeEco Le Pro3-ը, Moto Z-ը, OnePlus3-ը, Xiaomi Mi 5s-ը և Mi 5s Plus-ը, Asus Zenfone 3-ը, ինչպես նաև ZTE AXON 7-ը:
Բացի այդ, մշակողները առանձին ցուցակ են կազմել Android և iOS օպերացիոն համակարգերի համար: Ամենաարդյունավետ Android սմարթֆոնն է OnePlus 3T-ն, իսկ iOS գաջեթների շրջանում առաջին տեղն է զբաղեցրել 12,9 դյույմանոց iPad Pro-ն:
AnTuTu-ն գնահատում է այնպիսի պարամետրեր, ինչպիսիք են պրոցեսորի հզորությունը, օպերատիվ հիշողության, գրաֆիկական համակարգի և կուտակիչի աշխատանքի արագությունը: Ծրագիրը բջջային սարքերի արդյունավետության ամենաճանաչված թեստերից մեկն է: -0-
Ծանոթացեք լուրերին առաջինն ու քննարկեք դրանք մեր Telegram-ում
15:08 12.01.2017