Հայ օգտատերերը հայատառի փոխարեն նախընտրում են լատինատառ «որոնում» կատարել. փորձագետ
ԵՐԵՎԱՆ, 9 փետրվարի. /ԱՌԿԱ/. Հայ օգտատերերը նախընտրում են որոնողական համակարգերում լատինատառ գրել` հայատառի փոխարեն, ասվում է տեղեկատվական անվտանգության փորձագետ Սամվել Մարատիրոսյանի անձնական կայքում։
Հաշվի առնելով, որ փետրվարի 7-ը ինտերնետում մեսրոպատառ գրելու օրն էր, փորձագետը ներկայացրել է վերլուծություն` այն մասին, թե 2014թ. դեկտեմբերի ընթացքում Google որոնողական համակարգում, որքան են հայտառ որոնողական հարցումները զիջում նույնանուն լատինատառ որոնողական հարցումներին։
Ինչպես նշում է Ս. Մարտիրոսյանը, օրինակ հայտնի «Հարազատ թշնամին» սերիալին հայատառ հարցում արվել է 1110 անգամ, իսկ լատինատառ` Harazat Tshnami հարցումը հայերեն բնօրինակին գերազանցել է 60 անգամ` արձանագրելով 62440 թիվը։ Այսպիսի միտում նկատվում է գրեթե բոլոր հարցումների դեպքում։
«Ամենահետաքրքիրն այն է, որ հայատառ «Հայաստան» հարցումը 70 անգամ զիջում է նույնանուն լատինատառ «Hayastan» հարցմանը։ «Հայաստան» հարցումն ընդամենը 2350 անգամ է աչձանագրվել, այն դեպքում, երբ «Hayastan» հարցումն օգտատերերի կողմից նշվել է 153 520 անգամ։
Համացանցում հայկական այբուբենի օգտագործման օրը նշում են 2012թ.–ից բլոգեր Զոհրաբ Եգանյանի նախաձեռնությամբ։
Facebook սոցցանցի էջերում հայատառ գրառումներ կատարելու կոչով առաջին անգամ հանդես է եկել 2011թ.–ին վարչապետի պաշտոնը զբաղեցնող Տիգրան Սարգսյանը, ով պաշտոնատար անձանցից առաջինն էր, որը սկսեց հայկական այբուբենն օգտագործել իր գրառումներում։
Հայաստանում լատինական տառերից սկսել են օգտվել XX դարի 90–ականների կեսերից, երբ հանրապետությունում հայտնվեցին առաջին բջջային հեռախոսները, որոնք չունեին հայկական ստեղնաշար։
Փորձագետների խոսքով` հայերեն գրառում կատարելու համար ուրիշ այբուբեններ օգտագործելը հաճախ հանգեցնում է զավեշտալի դեպքերի։ Մասնավորապես, լատինատառ «սեխ» բառը գրելիս ստացվում է «sex»։–0– -
Ծանոթացեք լուրերին առաջինն ու քննարկեք դրանք մեր Telegram-ում
13:59 09.02.2015