Հայաստանում Orange ընկերության ներդրումները չեն արդարացրել իրենց. փորձագետ
ԵՐԵՎԱՆ, 22 հուլիսի. /ԱՌԿԱ/. France Telecom–ի (Orange ապրանքանիշ) ներդրումները Հայաստանում իրենց չեն արդարացրել և, հավանաբար, այդ պատճառով է ֆրանսիական ընկերությունը որոշել հեռանալ հայկական շուկայից, «ԱՌԿԱ» գործակալությանը հայտնեց տեղեկատվական անվտանգության փորձագետ Տիգրան Քոչարյանը։
«Orange Արմենիա» ընկերության գլխավոր տնօրեն Ֆրանսիս Ժելիբտերը չորեքշաբթի հայտնել է, որ Orange խումբը ներկա պահին բանակցություններ է վարում Ucom ընկերության հետ «Orange Արմենիա» ընկերության բաժնետոմսերի 100 տոկոսի վաճառքի մասին։
Քոչարյանի խոսքով, Orange–ը հայկական մասնաճյուղում ներդրել է մոտ 700 մլն դոլար, սակայն Հայաստանի ներքին իրավիճակը սխալ գնահատելու հետևանքով կորուստներ է կրել։
Մեկնաբանելով «Orange Արմենիա» բաժնետոմսերը Ucom–ին վաճառելու մասին բանակցությունները` փորձագետը նշեց, որ բիզնեսի տեսանկյունից դա շահավետ գնում է` չնայած «Orange Արմենիա»–ի կորուստներին։
«Ucom–ի մուտքը բջջային կապի շուկա և հեռահաղորդակցային խոշորագույն օպերատորի գնումը փակում է այն բացը, որ ուներ Ucom–ը, քանի որ ընկերությունը լավ է զարգանում ինտերնետ–կապի ոլորտում, իսկ նոր գործարքը հնարավորություն կտա նրան դառնալ ամբողջական հեռահաղորդակցային օպերատոր»,– ասաց Քոչարյանը։
Միաժամանակ փորձագետը քիչ հավանական է համարում հեռահաղորդակցային ծառայությունների շուկայի մենաշնորհայնացումը, քանի որ այնտեղ բավականին ուժեղ մրցակիցներ կան, որոնք հայկական շուկայում աշխատանքի փորձ ունեն։ Նա կարծում է, որ շուկայում մրցակցությունը ծառայության որակի բարելավման կհանգեցնի։
Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։
Աուդիտային հաշվետվության համաձայն, ընկերությունը 2014թ.–ին 4 մլրդ դրամի չափով վնասներ է կրել` 2013թ.–ի 3,85 մլրդ դրամի դիմաց։ 2014թ.–ի տվյալներով` Orange Արմենիայի ներդրումները հանրապետությունում 5–ամյա գործունեության ընթացքում գերազանցել են 100 մլրդ դրամը։
Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։-0-
Ծանոթացեք լուրերին առաջինն ու քննարկեք դրանք մեր Telegram-ում
20:46 22.07.2015