Օրանժ Արմենիա բջջային օպերատորը փոխել է բաժնետիրոջը և տնօրենին
ԵՐԵՎԱՆ, 30 սեպտեմբերի. /ԱՌԿԱ/. Օրանժ Արմենիա բջջային օպերատորը փոխել է բաժնետիրոջը և տնօրենին, հաղորդել է ընկերությունն իր կորպորատիվ հաճախորդներին ուղղված նամակում։
Ինչպես ասվում է ընկերության նամակում, սեպտեմբերի 3–ին տեղի է ունեցել ընկերության հիմնական բաժնետիրոջ փոխարինում, որի արդյունքում ընկերության բաժնետոմսերի 100 տոկոսն անցել է նոր սեփականատիրոջը` «Ucom»-ին։
Նույն օրը «Orange Armenia» ընկերության գլխավոր տնօրեն է նշանակվել Ալեքսանդր Եսայանը։
Հայաստանի հանրային ծառայությունները կարգավորող հանձնաժողովը (ՀԾԿՀ) օգոստոսի 20–ին որոշում է ընդունել «Orange Armenia» ՓԲԸ–ի (France Telcom–ի «դուստր») բաժնետոմսերի 100 տոկոսի օտարման մասին։
«Orange Armenia» ՓԲԸ–ի գլխավոր տնօրեն Ֆրանսիս Ժելիբտերը դեռ հուլիսի 22–ին էր տեղեկացրել այն մասին, որ Ucom հայկական ընկերությունը մտադիր է ձեռք բերել «Orange Armenia» ՓԲԸ–ի բաժնետոմսերի ողջ փաթեթը։ Նրա խոսքով` վաճառքի մասին որոշումը պայմանավորված չէ ֆինանսական պատճառներով, այլ` բաժանորդներին կոնվերգենտային ծառայություններ, այդ թվում` ֆիքսված կապ և հեռուստատեսություն տրամադրելու ցանկությամբ։
Ֆրանս Տելեկոմ Խմբի անդամ Օրանժ Արմենիան Հայաստանում շարժական հեռախոսակապի և ինտերնետի ծառայություններ է մատուցում 2009թ. նոյեմբերի 5-ից: Ընկերությունը Հայաստանում մինչ օրս կատարել է մոտ 250 միլիոն եվրոյի ներդրումներ (ներառյալ` լիցենզիայի ձեռքբերման համար) և արդեն ապահովում է բջջային կապի ու լայնաշերտ շարժական ինտերնետի հասանելիությունը Հայաստանի 600 քաղաքներում և գյուղերում` բնակչության ավելի քան 95% տոկոսին:
«Ucom» (Universal Communications, ունիվերսալ կապ) ընկերությունը հիմնադրվել է 2007 թվականին և զբաղվում է հեռահաղորդակցային ծառայությունների մատուցմամբ։ Ericsson–ի օժանդակությամբ, ընկերությունը ստեղծել է լայնաշերտ հասանելիության ցանց` մատուցելով ինտերնետ, IP-հեռուստատեսության և ֆիքսված հեռախոսակապի ծառայություններ: Ericsson-ի հետ համատեղ ընկերությունը ստեղծել է լայնաշերտ հասանելիության ցանց՝ տրամադրելով ինտերնետի, IP-հեռուստատեսության և հեռախոսային ծառայություններ:-0-
Ծանոթացեք լուրերին առաջինն ու քննարկեք դրանք մեր Telegram-ում
15:57 30.09.2015