Հայկական Shadowmatic խաղի վաճառքի ծավալը 10 անգամ ավելացել է հատուկ ակցիայի շնորհիվ
ԵՐԵՎԱՆ, 20 հուլիսի. /ԱՌԿԱ/. Հայկական հայտնի համակարգչային գլուխկոտրուկի` Shadowmatic–ի վաճառքի ծավալը տասն անգամ ավելացել է App Store–ում հայտարարված հատուկ ակցիայի շնորհիվ, «ԱՌԿԱ» գործակալությանը տեղեկացրեց Triada Studio–ի տեխնիկական տնօրեն և ծրագրավորող Բագրատ Դաբաղյանը։ Գլուխկոտրուկը մշակել է Triada Studio հայկական ՏՏ ընկերությունը,
App Store–ի անձնակազմը արժույթի փոխարժեքի տատանման կապակցությամբ նվազեցրել էր Հայաստանի, Ռուսաստանի, Մեքսիկայի, Հարավային Կորեայի, Հնդկաստանի, Թուրքիայի, Ինդոնեզիայի, Հարավային Աֆրիկայի մշակողների և հավելվածների վիրտուալ խանութի օգտատերերի համար նախատեսված նվազագույն գները։
Դաբաղյանը նշել է, որ օրինակ ռուս օգտատերերն այս պահին կարող են Shadowmatic–ը ներբեռնել ընդամենը 15 ռուբլով` նախկին 169 ռուբլու փոխարեն։
«Ավելի շատ սկսել են ներբեռնել Չինաստանի և Ռուսաստանի օգտատերերը։ Շահույթը չի ավելացել, սակայն խաղն ավելի հանրաճանաչ է դարձել, ինչն արդեն լավ է», – նշեց Դաբաղյանը։
Նա նաև ավելացրեց, որ App Store–ում հայտարարված հատուկ ակցիան մեկնարկել է հուլիսի 15–ին և կավարտվի հուլիսի 31–ին։
Հայկական մշակողների ստեղծած Shadowmatic խաղն արժանացել է Apple Design Awards հեղինակավոր մրցանակին «Դիզայն և հարմարավետություն/բջջային հավելված» անվանակարգում։ Triada Studio–ն հեղինակավոր մրցանակին արժանացել է հունիսի 8–12–ը Սան Ֆրանցիսկոյում կայացած The Apple Worldwide Developers Conference (WWDC) 2015 համաժողովի ժամանակ։
Արդեն վաճառքի հիթ դարձած և շատերի կողմից սիրված Shadowmatic խաղը գործարկվել է այս տարվա հունվարի 15–ին։ Հավելվածը հասանելի է 14 լեզվով, այդ թվում` հայերեն։ Երեխաների պաշտպանության միջազգային օրվա կապակցությամբ Խաղում ավելացել են նաև Arcade Mode–ն ու մանկական նոր մակարդակներ։
Խաղի ժամանակ առաջարկվում են տարբեր չափի, ձևի պատկերներ` միաձույլ կամ առանձին, և խաղացողը պետք է պատկերները հավաքի այնպես, որ ստվերը վերածվի կոնկրետ օբյեկտի։ –0–
Ծանոթացեք լուրերին առաջինն ու քննարկեք դրանք մեր Telegram-ում
15:26 20.07.2015
