Մայքլ Ջեքսոնի Thriller երգը կվերաթողարկվի 3D ձևաչափով
ԵՐԵՎԱՆ, 8 օգոստոսի. /ԱՌԿԱ/. Ամերիկացի փոփ–աստղ Մայքլ Ջեքսոնի (1958-2009) Thriller երգի տեսահոլովակը կվերաթողարկվի 3D ձևաչափով։ Այդ մասին հայտնել է ռեժիսոր Ջոն Լենդիսը, ով նկարահանել է օրիգինալ տեսահոլովակը 34 տարի առաջ։
Հոլովակի նոր տարբերակի պրեմիերան կկայանա Վենետիկի 74–րդ կինոփառատոնի շրջանակում, որը կանցնի օգոստոսի 30–ից սեպտեմբերի 9–ը։
Սակայն չի բացառվում, որ դրանից հետո եռաչափ տեսահոլովակը կցուցադրվի ԱՄՆ կինոթատրոններում, հայտնում է ՏԱՍՍ–ը։
Ինչպես պատմել է Լենդիսն Entertainment Weekly ամսագրին, 14–րոպեանոց հոլովակը վերածվել է եռաչափ հոլովակի ամենաառաջատար տեխնոլոգիաների օգնությամբ։ Տեսահոլովակն ամբողջությամբ վերականգնվել է, սակայն որևէ մոնտաժի կամ խմբագրման չի ենթարկվել` պահպանելով սկզբնական մտահղացումը։
Լենդիսի խոսքով, ինքը փորձում էր «օգտագործել 3D–ն ստեղծագործական կողմից»։ Ռեժիսորը խոստանում է զարմացնել ապագա հեռուստադիտողին գոնե մեկ «ցնցող անակնկալով»։ «Մենք ողջ ծավալով օգտվեցինք նոր տեխնոլոգիաների հնարավորություններից` ավելացնելով նոր չափում և լավացնելով ձայնը, հանելով այն նոր մակարդակի»,– պատմել է Լենդիսը։
Thriller երգի տեսահոլովակը լույս է տեսել 1983 թվականին և համարվում է պատմության մեջ ամենահայտնի և ճանաչված հոլովակներից մեկը։ Լենդիսի աշխատանքը ստաղել է մի քանի հեղինակավոր մրցանակներ, այդ թվում` Grammy։ MTV հեռուստաալիքը տեսանյութն ընդգրկել է բոլոր ժամանակների երաժշտական 100 լավագույն տեսահոլովակների ցանկում։ -0-
Ծանոթացեք լուրերին առաջինն ու քննարկեք դրանք մեր Telegram-ում
15:49 08.08.2017