Ucom-ը և «Դասավանդի՛ր, Հայաստան» կրթական հիմնադրամը համագործակցության հուշագիր են ստորագրել
ԵՐԵՎԱՆ, 23 նոյեմբերի. /ԱՌԿԱ/. Ucom ընկերությունը և «Դասավանդի՛ր, Հայաստան» կրթական հիմնադրամը համագործակցության հուշագիր են ստորագրել։ Գործակցությունն իրականացվելու է «Տեխնոլոգիաները հանուն կրթության» կարգախոսի ներքո, հայտնում է ընկերության մամուլի ծառայությունը։
«Այս գործակցությունը հնարավոր է դարձել՝ հաշվի առնելով ժամանակի մարտահրավերներին արձագանքելու և նորարարություններին հետևելու անհրաժեշտությունը։ Մենք կիսում ենք այն համոզմունքը, որ ժամանակակից տեխնոլոգիաների կիրառումը նպաստում է որակյալ կրթության մատչելիության բարձրացմանը և որ հանրակրթական համակարգում ներդրումները հնարավորություն կտան հեռանկարային առումով Հայաստանը դարձնել տեղեկատվական տեխնոլոգիաների և հեռահաղորդակցության ոլորտի առաջատար երկրներից մեկը», - նշել է Ucom ընկերության համահիմնադիր և գլխավոր տնօրեն Հայկ Եսայանը։
«Մենք ջանում ենք ստեղծել այնպիսի պայմաններ, որտեղ մեր ծրագրի մասնակիցները կունենան լայն հնարավորություններ իրականացնելու իրենց նորարարական նախագծերը՝ կիրառելով դրանք սեփական դասասենյակներում։ Համոզված ենք, որ այս համագործակցությունը կարող է կարևոր նշանակություն ունենալ՝ նպաստելով աշակերտների շրջանում ժամանակակից տեխնոլոգիաների նկատմամբ հետաքրքրության բարձրացմանը», - ասել է «Դասավանդի’ր, Հայաստան»-ի հիմնադիր եւ ղեկավար Լարիսա Հովhաննիսյանը։
Նշվում է, որ երկու կազմակերպությունները շարունակաբար համատեղ ծրագրեր են կյանքի կոչել, մասնավորապես՝ Բագարանում բացված «Արմաթ» լաբորատորիայի նախագիծը, նաև իրականացրել են համատեղ միջոցառումներ։ Ստորագրված հուշագրի նպատակն է համատեղել Ucom ընկերության և «Դասավանդի՛ր Հայաստան» հիմնադրամի ջանքերը՝ հանրակրթության բնագավառում նորարար տեխնոլոգիաների ներդրման և համապատասխան մասնագետների ներգրավման ուղղությամբ։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ:–0–
Ծանոթացեք լուրերին առաջինն ու քննարկեք դրանք մեր Telegram-ում
12:48 23.11.2018