Էլեկտրոնային գրիչները Ucom-ի վաճառքի և սպասարկման կենտրոններում թույլ կտան խուսափել հերթերից
ԵՐԵՎԱՆ, 7 հունիսի. /ԱՌԿԱ/. Ucom ընկերության վաճառքի և սպասարկման կենտրոններում էլեկտրոնային գրիչներ են տեղադրվել, որոնց շնորհիվ կարագանա ու կթեթևանա բաժանորդների սպասարկման գործընթացը, հայտնում է ընկերության մամուլի ծառայությունը։
«Որպես պատասխանատու ընկերություն` Ucom-ը կարևորում է ոչ միայն մեր բաժանորդների ժամանակը, այլև բնությունը: Էլեկտրոնային գրչի կիրառումը թույլ է տալիս կրճատել սպասարկման սրահում հերթերի կուտակման հնարավորությունը, փաստաթուղթը ստորագրելիս՝ չտպել այն, խնայել թուղթ և պատասխանատվությամբ վերաբերել շրջակա միջավայրին, բնությանը, ծառերին», - պարզաբանում է Ucom ընկերության վաճառքի տնօրեն Կարեն Շաբոյանը: Նրա խոսքով, այդ գրչով ստորագրված փաստաթղթի բնօրինակն ուղարկվում է բաժանորդի կողմից նշված էլեկտրոնային փոստի հասցեին, ինչը թույլ է տալիս անհրաժեշտության դեպքում այն միշտ ձեռքի տակ ունենալ։
Քանի որ բաժանորդագրության գործընթացի հետ կապված փաստաթղթերի կազմման և ստորագրման համար գրչի և թղթի օգտագործումը, ինչպես նաև դրանց բնօրինակների թղթային տարբերակների արխիվացումը մեծ ռեսուրսներ պահանջող գործընթաց է, էլեկտրոնային գրչի լուծումը շահավետ է թե՛ բաժանորդների, և թե՛ օպերատորների համար:
Այսպիսով, ինչպես նշում են ընկերությունից, բաժանորդները կարող են ստորագրել բաժանորդագրության գործընթացի հետ կապված ցանկացած փաստաթուղթ այնպես, ինչպես կստորագրեին փաստաթղթի թղթային տարբերակը, և այնուհետ փաստաթուղթն առանց տպելու պահպանել իրենց անձնական էլեկտրոնային փոստարկղում: Իսկ օպերատորների համար տվյալ լուծումը թույլ է տալիս վարել էլեկտրոնային փաստաթղթերի բազա, խնայել ռեսուրսներ և ավելի արագ իրականացնել բաժանորդների սպասարկումը:
Մինչև հունիսի վերջ էլետրոնային գրիչները հասանելի կդառնան Ucom-ի բոլոր, այդ թվում՝ մարզային սպասարկման կենտրոններում:
Ucom (Universal Communications) հայկական ընկերությունը հիմնադրվել է 2007 թ.: Հանդիսանալով Հայաստանյան հեռահաղորդակցային շուկայի առաջատարներից մեկը, Ucom ընկերությունը առաջարկում է այս ոլորտում ծառայությունների լիարժեք շարք՝ գերարագ սիմետրիկ ինտերնետ, IP հեռուստատեսություն և ֆիքսված թվային հեռախոսակապ: Համագործակցելով Ericsson ընկերության հետ, Ucom-ը կառուցում է նոր սերնդի ամենամեծ օպտիկամանրաթելային ցանցը Հայաստանում: -0-
Ծանոթացեք լուրերին առաջինն ու քննարկեք դրանք մեր Telegram-ում
18:37 07.06.2017