ՎիվաՍել-ՄՏՍ-ը հայտնաբերել և դադարեցրել է Երևանի կենտրոնում իր ցանցերի անօրինական հասանելիությունը
ԵՐԵՎԱՆ, 8 նոյեմբերի. /ԱՌԿԱ/. ՎիվաՍել–ՄՏՍ բջջային օպերատորը հայտնաբերել և դադարեցրել է Երևանի կենտրոնում անօրինական սարքավորման միջոցով իր ցանցերի անօրինական հասանելիությունը, ուրբաթ հաղորդեցին ընկերության մամուլի ծառայությունից։ «ՎիվաՍել-ՄՏՍ-ը տեղեկացնում է, որ ընկերությանը հատկացված հաճախականություններին իրականացվող միջամտության աղբյուրը՝ չարտոնված և անօրինական սարքերը, հայտնաբերվել են, և դրանց գործունեությունը դադարեցվել է»,– ասվում է հաղորդագրության մեջ։ Վերը նշված խնդիրների պատճառով ՎիվաՍել-ՄՏՍ-ի բաժանորդները որոշակի դժվարությունների էին հանդիպում Երևանի կենտրոնական հատվածում, ներառյալ Իսահակյան, Թումանյան, Աբովյան, Տերյան, Մոսկովյան փողոցներին, ինչպես նաև «Կասկադ» համալիրի և մետրոպոլիտենի «Երիտասարդական» կայարանին հարող տարածքներում: ՎիվաՍել–ՄՏՍ–ը տեղեկացնում է, որ հետագայում ևս ընկերությանը հատկացված հաճախականություններին միջամտող սարքերի չարտոնված և անօրինական տեղադրման ու օգտագործման դեպքում կձեռնարկի բոլոր անհրաժեշտ օրինական քայլերը՝ վերը նշված սարքերի գործունեությունը կանխելու և դադարեցնելու համար: Հոկտեմբերի վերջին ընկերությունը տեղեկացրեց իր ցանցերի անօրինական հասանելիության հայտնաբերման մասին, որի պատճառով ընկերության բաժանորդները Երևանի կենտրոնական հատվածներում կարող էին ունենալ որոշակի խնդիրներ՝ կապված շարժական հեռախոսակապի ձայնային և տվյալների փոխանցման ծառայությունների հասանելիության հետ։ ՎիվաՍել-ՄՏՍ (Ղ-Տելեկոմ) ընկերությունը հայկական շուկայում աշխատում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: –0–
Ծանոթացեք լուրերին առաջինն ու քննարկեք դրանք մեր Telegram-ում
16:05 08.11.2013
