Yandex.Taxi-ն այժմ գործում է նաև Հրազդանում, Ծաղկաձորում, Չարենցավանում, Սպիտակում և Արթիկ

ԵՐԵՎԱՆ, 20 մարտի. /ԱՌԿԱ/. Yandex.Taxi ծառայությունը գործարկվել է Հայաստանի ևս հինգ քաղաքներում` Հրազդանում, Ծաղկաձորում, Չարենցավանում, Սպիտակում և Արթիկում: Այսուհետ այս քաղաքների բնակիչներն ու զբոսաշրջիկները կարող են տաքսի պատվիրել բջջային հավելվածի կամ taxi.yandex.com կայքի միջոցով, հայտնում է ընկերության մամուլի ծառայությունը:

Yandex.Taxi-ն ավտոմատ կերպով որոշում է օգտատիրոջ գտնվելու վայրը և պատվերն առաջարկում այն վարորդին, ով ամենաարագը կմոտենա պատվիրատուին. հավելվածը հաշվի է առնում հեռավորությունը և ճանապարհային իրավիճակը: Տաքսու սպասման միջին ժամանակը 3-5 րոպե է, մեքենայի մոտեցմանը կարող եք հետևել հավելվածում առկա քաղաքի քարտեզի միջոցով։

«Հրազդանում, Ծաղկաձորում, Չարենցավանում, Սպիտակում և Արթիկում երթևեկության նվազագույն արժեքը չի գերազանցում 200 դրամը։ Արժեքի մեջ ներառված է մեքենայի մոտեցման և ճանապարհի 2 կմ-ի արժեքը, այնուհետև, մեկ կիլոմետրը' առավելագույնը 100 դրամ», - հայտնում են ընկերությունիյց:

«Այն քաղաքներում, որտեղ գործում է մեր ծառայությունը, տաքսին դառնում է առօրյա կյանքի մի մասը: Այն աշխատավայր հասնելու, առևտրի կամ հյուր գնալու էժան, արագ և հուսալի միջոց է: Պատվերն ավտոմատ կերպով փոխանցելով այն վարորդին, ով ամենաարագը կմոտենա պատվիրատուին, մենք կրճատում ենք մեքենայի մոտեցման և պարապ ընթացքի ժամանակը, իսկ վարորդի համար նոր պատվեր փնտրում ենք այն վայրում, ուր նա արդեն գնում է ուղևորի հետ», — պատմում է Yandex.Taxi-ի միջազգային զարգացման տնօրեն Մուշեղ Սահակյանը:

Նրա խոսքով, այս ամենը նվազեցնում է ուղևորության ինքնարժեքը. վարորդները վաստակում են ավելի շատ, իսկ օգտատերերը վճարում են ավելի քիչ:

«Yandex.Taxi-ին վարորդների հետ ուղղակիորեն չի աշխատում, այն համագործակցում է միայն տաքսոպարկերի և դիսպետչերական ծառայությունների հետ: Պատվերները բաշխելիս հավելվածը հաշվի է առնում վարորդի վարկանիշը, որը ձևավորվում է օգտատերերի գնահատականների և կատարված ուղևորությունների վիճակագրության հիման վրա», - նշվում է տարածած հաղորդագրությունում:

Հայաստանում ծառայությունը գործարկվել է 2016 թվականի հուլիսին: Այսօր Yandex.Taxi-ն գործում է Երևանում և երկրի մի քանի շրջաններում` Լոռու մարզում (Վանաձոր, Սպիտակ), Շիրակի մարզում (Գյումրի, Արթիկ), Կոտայքի մարզում (Հրազդան, Աբովյան, Ծաղկաձոր, Չարենցավան), Արարատի մարզում (Արտաշատ, Վեդի, Մասիս) և Սյունիքի մարզում (Գորիս, Կապան)։

Նշվում է նաև, որ Yandex.Taxi անվճար հավելվածը հասանելի է iOS-ի և Android-ի համար՝ հայերեն, ռուսերեն, անգլերեն և այլ լեզուներով:

Yandex.Taxi-ն առցանց տաքսի պատվիրելու ծառայություն է: Հավելվածը որոշում է օգտատիրոջ գտնվելու վայրը և պատվերն ուղարկում այն վարորդին, ով ամենաարագը կմոտենա պատվիրատուին: Yandex-ի տեխնոլոգիաները՝ պահանջարկի և խցանումների կանխատեսումը, քարտեզի վրա երթուղու կառուցումը և ալգորիթմերի միջոցով պատվերների բաշխումը, թույլ են տալիս նվազեցնել մեքենայի պարապուրդի ու դատարկ վազքի ժամանակը, որի շնորհիվ ուղևորության արժեքը նվազում է, իսկ վարորդների եկամուտը՝ ավելանում: Yandex.Taxi և Uber միավորված ընկերությունը գործում է ութ երկրների 300 քաղաքներում: 

Ծանոթացեք լուրերին առաջինն ու քննարկեք դրանք մեր Telegram-ում

17:04 20.03.2018