Ամփոփվել են պետական էլ. կառավարման համակարգերի տեղեկատվական ավտանգության հաքաթոնի արդյունքները
ԵՐԵՎԱՆ, 1 հուլիսի./ԱՌԿԱ/. Առաջատար տեխնոլոգիաների ձեռնարկությունների միության (ԱՏՁՄ) ռազմավարության «Պետությունը՝ որպես պատվիրատու» (e-Gov) ուղղության աշխատանքների շրջանակում ԱՏՁՄ-ն և միության անդամ ArmSec հիմնադրամը նախաձեռնել են Bug Bounty: e-Gov հաքաթոն՝ բացահայտելու և մշակելու ՀՀ-ում գործող պետական էլ. կառավարման համակարգերի տեղեկատվական անվտանգության խոցելիություններն ու դրանց լուծման հնարավորությունները:
Ինչպես հայտնում է Ucom-ի մամուլի ծառայությունը, Bug Bounty: e-Gov հաքաթոնն անցկացվել է «Հայ տեք» կիբեռանվտանգության կենտրոնում 6 թիմի (շուրջ 30 մասնագետների) մասնակցությամբ և տևել է 20 ժամ: Պետական համակարգի խոցելիություններ հայտնաբերած լավագույնների եռյակում են NGG, Հայդուկ եւ Bug Hunters թիմերը: Մրցանակային ֆոնդը կազմում է 2000 դոլարին համարժեք դրամ, որը սահմանել են հաքաթոնի աջակիցներ VXSoft և Grant Thornton Armenia ընկերությունները: ԱՏՁՄ անդամ` Grant Thornton Armenia ընկերություն ապահովում է նաեւ պրակտիկայի հնարավորություն:
«Սա թերևս պետության և «սպիտակ գլխարկով» հաքերների համագործակցության` համակարգի թեստավորման ու խնդիրների բացահայտման առաջին նախադեպն է այս ձևաչափով», - նշում է Սամվել Մարտիրոսյանը:
«Ucom ընկերությունը մեծագույն պատրաստակամությամբ է աջակցել e-Gov հաքաթոնի իրականացմանը, որի գաղափարը դեռ տարիներ առաջ էր ձևավորվել հայաստանյան ՏՀՏ համայնքում: Այս կարևոր նախագծում ամբողջական տեխնիկական աջակցությամբ ենք հանդես գալիս` տրամադրելով ամպային լուծումներ, ինտերնետ և այլն», - Ucom ընկերության համահիմնադիր և գլխավոր տնօրեն Հայկ Եսայանը:
«Մենք գտնվում ենք հիբրիդային տիպի պատերազմի պայմաններում և կարևոր է հաղթել մարտի բոլոր դաշտերում՝ այդ թվում տեղեկատվական ազդեցության և կիբեռանվտանգության ոլորտներում», - նշել է ԱՏՁՄ գործադիր տնօրեն Կարեն Վարդանյանը:
Bug Bounty: e-Gov հաքաթոնի շրջանակում ԱՏՁՄ-ի` ի դեմս գործադիր տնօրեն Կարեն Վարդանյանի և «Հայ տեք» կիբեռանվտանգության կենտրոն հիմնադրամի` ի դեմս տնօրեն Լևոն Պետրոսյանի միջև կնքվել է Հայաստանի կիբեռանվտանգությունն ապահովելու գործընթացներում համագործակցության մասին հուշագիր:
Նշվում է, որ Bug Bounty: e-Gov հաքաթոնը անցկացվել է ԱՏՁՄ-ի և ArmSec հիմնադրամի կողմից հունիսի 28-ից 29-ը: Հաքաթոնի աջակիցներն են` «Հայ տեք» կիբեռանվտանգության կենտրոն հիմնադրամը, Ucom, VXSoft, Grant Thornton Armenia եւ 1Guard ընկերությունները: -0-
Ծանոթացեք լուրերին առաջինն ու քննարկեք դրանք մեր Telegram-ում
15:29 01.07.2019