Ռոստելեկոմը Հայաստանում ամփոփել է «Տեխնոլոգիաներ կյանքի համար. ինտերնետ լույսի արագությամբ» խորագրով մրցույթի արդյունքները
ԵՐԵՎԱՆ, 26 մայիսի. /ԱՌԿԱ/. Ռոստելեկոմը Հայաստանում ամփոփել է լրագրողների շրջանում անցկացված «Տեխնոլոգիաներ կյանքի համար. Ինտերնետ լույսի արագությամբ» խորագրով մրցույթի արդյունքները։ Հաղթող է ճանաչվել «Արմենիա» հեռուստաընկերության լրագրող Հայկուհի Ասատրյանը։
«Տեխնոլոգիաներ կյանքի համար. ինտերնետ լույսի արագությամբ» ամենամյա մրցույթը կազմակերպել է «Ռոստելեկոմ» ընկերությունը` Huawei, ՌԱԷԿ, «Միխայլով և գործընկերները» ընկերությունների հետ համատեղ, ռուսական և հայկական առաջատար տարածաշրջանային ԶԼՄ–ների տեղեկատվական աջակցությամբ։ Նախագիծն իրականացվում է 2011թ.–ից, իսկ 2014թ.–ի դեկտեմբերի 23–ին այն առաջին անգամ կազմակերպվել է նաև Հայաստանում։
Ամփոփելով արդյունքները՝ «ՋԻԷՆՍԻ-ԱԼՖԱ» ՓԲԸ–ի գլխավոր տնօրեն Հայկ Ֆարամազյանն ընդգծել է ՏՏ ոլորտի մասին հանրությանն իրազեկման կարևորությունն ու պրոֆեսիոնալիզմի բարձր մակարդակը, որ դրսևորում են հայաստանյան լրագրողներն այս հարցում։ Նա բոլորին մաղթել է նոր և հետաքրքիր սյուժեներ և արդյունավետ աշխատանք ինովացիոն ու բարձր տեխնոլոգիաների ոլորտում։
«Մենք միշտ աջակցելու ենք նման նախագծերին, որոնք թույլ են տալիս բարձրացնել բնակչության իրազեկվածության մակարդակը հայկական շուկայում տեխնոլոգիական նորույթների մասին», –ասել է Ֆարամազյանը։
Կազմակերպիչները պատվոգրեր և հուշանվերներ են հանձնել «ԱՌԿԱ» գործակալությանը։
Հաղթողը հունիսին կմեկնի Մոսկվա, կհանդիպի մրցույթի տարածաշրջանային փուլի բոլոր հաղթողների հետ։ Այնտեղ էլ կհրապարակվեն Ռուսաստանում կազմակերպված մրցույթի հաղթողների անունները, ովքեր 2015թ.–ի աշնանը կմեկնեն Չինաստան։
2015թ.–ի աշնանը պատվիրակությունը, որի կազմում կներառվեն «Տեխնոլոգիաներ կյանքի համար. ինտերնետ լույսի արագությամբ» միջազգային մրցույթի հաղթողները, կայցելել Չինաստանի Շենչժեն քաղաքում գտնվող Huawei ընկերության գլխամաս, որտեղ լրագրողները հնարավորություն կունենան ծանոթանալ նոր տեխնոլոգիաներին, որոնք սպասվում են աշխարհին արդեն վաղը։
Մրցույթն անցկացվում էր ՏՏ ոլորտը լուսաբանող ԶԼՄ–ների բոլոր ներկայացուցիչների շրջանում` տպագիր մամուլ (թերթեր, ամսագրեր), ռադիո և հեռուստատեսություն, ինտերնետային ԶԼՄ–ներ, լրատվական գործակալություններ, սոցիալական մեդիա (բլոգերներ)։
Հայկական ԶԼՄ–ների համար ժյուրիի կազմում ներառվել էին ՏՏ ոլորտի և գործարար ԶԼՄ–ների ներկայացուցիչները` Ինֆորմացիան տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը, Ձեռնարկությունների ինկուբատոր հիմնադրամի (EIF) տնօրեն Բագրատ Ենգիբարյանը, Microsoft Armenia–ի տնօրեն Եվա Հյուսյանը, ԱՄԻ «Նովոստի–Արմենիա» գործակալության գլխավոր տնօրեն Գալինա Դավիթյանը, «Արմենպրես» ինֆորմացիոն գործակալության տնօրեն Արամ Անանյանը, ինչպես նաև «ՋԻԷՆՍԻ-ԱԼՖԱ» ՓԲԸ–ի հասարակության հետ կապերի բաժնի ղեկավարը, «Ռոստելեկոմի» խումբը։
Նախորդ մրցույթի ընթացքում հաղթողներն այցելել էին Ericsson ընկերության գրասենյակ։ –0–
Ծանոթացեք լուրերին առաջինն ու քննարկեք դրանք մեր Telegram-ում
20:58 26.05.2015