Apple–ը 368 մլն դոլար տուգանք կվճարի պատենատային խախտումների համար
ԵՐԵՎԱՆ, 8 նոյեմբերի. /ԱՌԿԱ/. Էլեկտրոնիկայի արտադրությամբ և ծրագրային ապահովությամբ զբաղվող Apple ընկերությունը ԱՄՆ–ում 368 մլն դոլար տուգանք կվճարի VirnetX մշակողների հեղինակային իրավունքները խախտելու համար։
Խոսքը վերաբերում է Facetime հավելվածի միջոցով տեսազանգ կատարելիս անվտանգ միացման պատենտային արձանագրությունների անօրինական օգտագործմանը, տեղեկացնում է France24–ը։
Վճիռը կայացրել է Տեխաս նահանգի դաշնային դատարանի ատենակալների կոլեգիան։ Գործի վերաբերյալ վերջնական նիստերը կավարտվեն առաջիկա մի քանի շաբաթվա ընթացքում։
«Մենք չափազանց ուրախ ենք Apple–ի հետ կապված մեր դատավարությունից։ Հաղթանակը մեր պատենտային պորտֆելի արժեքը ևս մեկ անգամ ապացուցելու հնարավորություն է տալիս մեզ»,– ասել է VirnetX–ի նախագահ ու գործադիր տնօերն Քենդըլ Լարսենը։
Apple–ից բացի, VirnetX–ը պատենտային վեճ է լուծում նաև Cisco Systems–ի, ինչպես նաև մի շարք ավելի փոքր կազմակերպությունների հետ։ 2010 թվականին VirnetX–ը շահել է Microsoft–ի հետ ունեցած դատը` ստիպելով ընկերությանը վճարել 200 մլն դոլար։
Apple–ը դեռ պաշտոնական մեկնաբանություն չի արել դատավարության արդյունքի վերաբերյալ։
Նշենք, որ բացասական տեղեկատվության հերթական չափաբաժնի ֆոնին ամերիկյան ՏՏ ինդուտրիայի հսկայի բաժնետոմսերի արժեքը շարունակում է նվազել։ Բորսային փորձագետների տվյալներով` սեպտեմբերի 19-ից ի վեր Apple–ի շուկայական կապիտալիզացիան կրճատվել է համարյա 20 տոկոսով։--0-
Ծանոթացեք լուրերին առաջինն ու քննարկեք դրանք մեր Telegram-ում
11:38 08.11.2012