Apple–ի դեմ պատերազմում Սիլիկոնային հովտի հսկաները միավորվել են Samsung–ի շուրջ

ԵՐԵՎԱՆ, հուլիսի 21. /ԱՌԿԱ/. Facebook, Google, Dell, HP, eBay և Սիլիկոնային հովտի այլ խոշոր ընկերությունները միջնորդություն են ներկայացրել ԱՄՆ–ի Դաշնային շրջանային բողոքարկման դատարան` խնդրելով աջակցել Samsung Electronics–ին, որպեսզի վերանայի Apple–ի պատենտները խախտելու համար սահմանված տուգանքը, հաղորդում է  Cnews–ը` հղում անելով Guardian–ին։

Cnews–ի համաձայն, ընկերությունների համատեղ հայտարարությունում ասվում է, որ Samsung–ի հետ դատական գործընթացում Apple–ի հաղթանակը «աղետալի հետևանքներ կառաջացնի արդյունաբերությունում` օգտակար տեխնոլոգիաների հետագա մշակման առումով»։

Apple–ի և Samsung–ի միջև վեճը ավելի քան 3 տարվա պատմություն ունի։ Apple–ը կորեացի արտադրողին մեղադրում է բջջային սարքերում իր տեխնոլոգիաներն անօրինական կերպով օգտագործելու մեջ։ Այսօր այդ մեթոդները չափանիշ են և կիրառվում են բոլոր ապրանքանիշների բջջային սարքերում։

Ընկերությունը նաև մեղադրել է մրցակցին սարքերի պատենտավորված դիզայնն անօրինական կերպով օգտագործելու մեջ։ Դրան ի պատասխան` Samsung–ը մեղադրել է Apple–ին սեփական պատենտները խախտելու մեջ։

2014թ.–ին կողմերը պայմանավորվել են հետ կանչել ԱՄՆ–ի սահմաններից դուրս փոխադարձ գանգատները։ Այսպիսով, ԱՄՆ–ն դարձել է եզրափակիչ մարտադաշտ։-0-

Ծանոթացեք լուրերին առաջինն ու քննարկեք դրանք մեր Telegram-ում

21:50 21.07.2015