«Արմաթ» լաբորատորիաների սաներն առանձնանում են հետաքրքիր ու նորարար տեխնոլոգիական լուծումներով. Ucom–ի տնօրեն

ԵՐԵՎԱՆ, 16 հունվարի. /ԱՌԿԱ/. Օրեր առաջ Շիրակի մարզի Ախուրյանի Նիկոլ Աղբալյանի անվան ավագ դպրոցի «Արմաթ» ինժեներական խմբակ-լաբորատորիայի սաները հյուրընկալել էին նախագծի պատասխանատուներին Ucom ընկերությունից և Ինֆորմացիոն տեխնոլոգիաների ձեռնարկությունների միությունից (ԻՏՁՄ), հայտնում է Ucom-ի մամուլի ծառայությունը։

Շրջայցի ժամանակ «Արմաթի» սաները ցուցադրել են այն ամենն, ինչ սովորել են մեկ տարվա ընթացքում: Երեխաները հմտացել են «Աղվես» և «Կրիա» ծրագրերի օգնությամբ խաղեր ստեղծելու, մուլտֆիլմեր պատրաստելու, մաթեմատիկական հաշվարկներ իրականացնելու, եռաչափ տպիչով առարկաներ մոդելավորելու ու տպելու մեջ:

«Այստեղ մենք ոչ միայն խաղեր ենք ծրագրավորում, այլև ռոբոտներ ենք ստեղծում, որոնք կարող են կիրառելի դառնալ թե՛ բանակում, թե՛ տանը», - նշել է Ախուրյանի Ն.Աղբալյանի անվան ավագ դպրոցի «Արմաթ» ինժեներական լաբորատորիայի սան Ալբերտ Հովհաննիսյանը:

«Յուրաքանչյուր անգամ, երբ «Արմաթ» ինժեներական լաբորատորիաների սաները զրույցի ընթացքում պատմում են, թե ինչ տեսակի ռոբոտներ են ցանկանում ստեղծել, ես հպարտություն եմ զգում, որ ապագայում ապրելու եմ նրանց կերտած Հայաստանում: Մեր մեծագույն հարստությունը հենց այս երեխաներն են, ովքեր հաճախ ավելի հետաքրքիր ու նորարար տեխնոլոգիական լուծումներ են առաջարկում, քան ավագ սերնդի ներկայացուցիչները», - ասել է Ucom ընկերության գլխավոր տնօրեն Հայկ Եսայանը:

Նույն լաբորատորիայի ռոբոտատեխնիկայի խմբակի ղեկավար Շուշանիկ Պողոսյանն իր հերթին ասել է, որ խմբակ հաճախող երեխաների քանակը կանոնավոր կերպով ավելանում է: «Երեխաները հաճույքով են սովորում ծրագրավորման, ռոբոտաշինության հիմունքները, իսկ եռաչափ տպիչը ստանալուց հետո՝ հաճույքով մոդելավորում և տպում են կենցաղում կիրառելի առարկաներ: Կարծում եմ՝ խմբակ հաճախողների 60%-ը կընտրի ինժեների մասնագիտությունը», - ասել է նա։

Հիշեցնենք, որ ԻՏՁՄ-ի և Ucom ընկերության միջև ստորագրված համագործակցության հուշագրի համաձայն՝ Ucom ընկերությունը ներդրումներ է կատարում, որպեսզի Հայաստանի 9 մարզերում բացվեն «Արմաթ» անվանումը կրող շուրջ 70 ինժեներական խմբակ-լաբորատորիաներ։

Նախագիծը նպատակ ունի խթանելու տեխնոլոգիական կրթությունը Հայաստանի համայնքների բոլոր դպրոցներում, նպաստելու աշակերտների մոտ ժամանակակից բարձր տեխնոլոգիաների նկատմամբ հետաքրքրության առաջացմանը, վաղ տարիքից ճարտարագիտական մտածելակերպի զարգացմանը և բանիմաց ուսանողների նախապատրաստմանը։

«Արմաթ» ինժեներական խմբակ-լաբորատորիաներում մշակված ծրագրային փաթեթները, ինչպես նաև սարքավորումների գծագրերը բաց են հանրության համար։ Խմբակ-լաբորատորիաների համար ծրագրային միջոցներ ձեռք բերելիս նախապատվություն է տրվում տեղական արտադրողին, ինչի վառ օրինակ են հանդիսանում Հայաստանում արտադրված բարձրակարգ եռաչափ (3D) տպիչները, մինի համակարգիչները, ռոբոտաշինության հավաքածուները և այլ սարքերը։

Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։ -0-

Ծանոթացեք լուրերին առաջինն ու քննարկեք դրանք մեր Telegram-ում

14:14 16.01.2017