Beeline–ը հայ բաժանորդներին 100 դրամով USB–մոդեմներ կտրամադրի
ԵՐԵՎԱՆ, 7 հոկտեմբերի. /ԱՌԿԱ/. «ԱրմենՏել» ՓԲԸ–ի բաժանորդները (Beeline ապրանքանիշ) կկարողանան ստանալ USB-մոդեմներ բջջային ինտերնետի սակագնային փաթեթներին մեկ տարի ժամկետով բաժանորդագրվելու դեպքում, հայտնում է ընկերության մամուլի ծառայությունը:
Առաջարկը գործում է այն հաճախորդների համար, ովքեր կբաժանորդագրվեն «Infinity 1024», «Infinity 512», «Drive 5», «Drive 15» կամ «Drive 40» բջջային ինտերնետի սակագնային փաթեթներին 12 ամիս ժամկետով:
«Մեր բաժանորդների շրջանում անցկացված հերթական հարցումը ցույց տվեց, որ առկա է խորհրդանշական գնով USB-մոդեմներ տրամադրման պահանջարկ: Մենք մշտապես ձգտում ենք առավելագույնս արագ բավարարել հաճախորդների պահանջները` Beeline-ի ծառայություններից օգտվելը դարձնելով էլ ավելի հաճելի, պարզ և հարմար», - նշեց Հայաստանում Beeline-ի Գլխավոր տնօրեն Անդրեյ Պյատախինը:
Մինչև 12 ամիս ժամկետը լրանալը պայմանագիրը խզելու դեպքում բաժանորդը վճարում է մոդեմի արժեքը` հաստատված պայմանագրի ստորագրման օրը: Առաջարկի շրջանակում հնարավոր չէ անցում կատարել այլ սակագնային փաթեթների:
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–
Ծանոթացեք լուրերին առաջինն ու քննարկեք դրանք մեր Telegram-ում
20:26 07.10.2015