Beeline-ը մինչև տարեվերջ 14 գրասենյակներում էլեկտրոնային հերթի համակարգեր կներդնի

ԵՐԵՎԱՆ, 16 դեկտեմբերի. /ԱՌԿԱ/. Beeline-ը մինչև տարեվերջ 14 գրասենյակներում էլեկտրոնային հերթի համակարգեր կներդնի` ի հավելումն արդեն գործող հինգ գրասենյակների, տեղեկացրեցին ընկերության մամուլի ծառայությունից։

Հաղորդագրության համաձայն` առաջնահերթությունը կտրվի այն գրասենյակներին, որտեղ հերթեր հաճախակի են նկատվում, մասնավորապես` Շիրակի, Արագածոտնի, Լոռու, Տավուշի, Վայոց Ձորի, Սյունիքի, Արարատի մարզերում գործող գրասենյակներին։

Ընկերությունը նախատեսում է 2015 թ.–ին ավելացնել վաճառքի և սպասարկման գրասենյակների թիվը, որտեղ կտեղադրվեն էլեկտրոնային հերթի համակարգեր։

Ընկերությունից նշեցին, որ էլեկտրոնային համակարգի ներդրումը հնարավորություն է ընձեռում ավելի համակարգված և հարմարավետ դարձնել բաժանորդների սպասարկումը: Բաժանորդը պետք է պարզապես ընտրի անհրաժեշտ գործողությունը վճարային տերմինալի միջոցով, ստանա կտրոնը և սպասի համապատասխան թվի հայտնվելուն էլեկտրոնային ցուցանակի վրա։

Ինչպես նշել է Հայաստանում Beeline-ի գլխավոր տնօրեն Անդրեյ Պյատախինը, մեծ ուշադրություն դարձնելով հաճախորդների սպասարկման որակին և պայմաններին՝ ընկերությունը շարունակում է վաճառքի և սպասարկման գրասենյակների վերազինումը էլեկտրոնային հերթի համակարգերով, ինչը բաժանորդների սպասարկումը կդարձնի ավելի հստակ և գրագետ։

«Նման համակարգերի ներդրումն ունի անհերքելի և ակնհայտ բազմաթիվ առավելություններ ինչպես մեր հաճախորդների, այնպես էլ ընկերության աշխատակիցների համար: Համոզված եմ, որ այս քայլը ևս մեր բաժանորդների սպասարկումը կդարձնի էլ ավելի պարզ և հարմար», – ասել է նա։

ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–