Beeline-ը և Է. Միրզոյանի անվան քառյակն ամփոփել են 2016թ. համագործակցության արդյունքները
ԵՐԵՎԱՆ, 22 դեկտեմբերի. /ԱՌԿԱ/. «ԱրմենՏել» ընկերությունը (ապրանքանիշը` Beeline) և Էդուարդ Միրզոյանի անվան լարային քառյակն ամփոփել են 2016 թվականի համագործակցության արդյունքները:
Մասնավորապես, անցած համերգաշրջանի ընթացքում քառյակը հանդես է եկել 10-ից ավելի բարեգործական համերգներով և մի շարք վարպետության դասերով, նշանակալի են ռուսական առաջատար փողային երաժիշտների և Ռուսաստանի վաստակավոր արտիստուհի Մարիա Ֆեդոտովայի (ֆլեյտա) ելույթները թիվ 13 երաժշտական գիշերօթիկ դպրոցի սաների համար:
Հաղորդագրության համաձայն, 2016 թվականի ամռանը քառյակը մասնակցել է ՀՀ Մշակույթի նախարարության պատվերով նկարահանված Է. Մ. Միրզոյանի կյանքին և ստեղծագործությանը նվիրված փաստավավերագրական ֆիլմի նկարահանումներին:
Ընթացիկ տարվա նոյեմբերին քառյակը մասնակցել է Լիբանանում կայացած կամերային երաժշտության միջազգային «Les Musicales de Baabdath» փառատոնին, որտեղ ներկայացրել է Հայաստանը, իսկ 2016թ. դեկտեմբերին քառյակի երաժիշտները թողարկել են երկար սպասված ձայնասկավառակ` Է. Միրզոյանի լեգենդար «Շուշանիկ» մշակումը լարային քառյակի համար, որի իրացումից գոյացած բոլոր միջոցները կուղղվեն Արցախյան զինծառայողների ընտանիքների հիվանդ երեխաների բուժմանը:
Հայաստանում Beeline-ի գլխավոր տնօրեն Անդրեյ Պյատախինի խոսքով, Միրզոյանի անվան քառյակի հետ համագործակցությունը ընկերության սոցիալական պատասխանատվության դրսևորման վառ օրինակներից է, որն ուղղված է ոչ միայն դասական երաժշտության հանդեպ պրոֆեսիոնալիզմի և հետաքրքրության պահպանմանը, այլև երիտասարդ սերնդին կրթելուն և նրանց մշակութային զարգացմանը:
«Նմանօրինակ ծրագրերով Beeline-ը ձգտում է կյանքն էլ ավելի լավ դարձնել, և մենք ուրախ ենք, որ մեր աջակցության շնորհիվ երաժիշտների երիտասարդ սերունդը կարող է զարգացնել իր տաղանդը և ձգտել դեպի նորանոր բարձունքներ այն արվեստում, որին իրենց կյանքն են նվիրաբերել», - նշել է նա:
««Միրզոյան քառյակի» կոլեկտիվն իր երախտագիտությունն է հայտնում Beeline-ին, արդեն երրորդ տարին մեր կողքին գտնվելու և բոլոր մշակութային միջոցառումներում աջակցություն ցուցաբերելու համար, որոնց շարքում հատկապես կցանկանայինք ընդգծել բարեգործական համերգները և վարպետության դասընթացները անապահով ընտանիքների երեխաների և Հայաստանի մանկատների սաների համար», - նշել են Է. Միրզոյանի անվան քառյակի երաժիշտները:
Քառյակի գործունեության ընթացքում երաժիշտները հաջողությունների են հասել բազմաթիվ միջազգային մրցույթներում և հայտնի են դարձել ոչ միայն մեր երկրում, այլ նաև` ամբողջ աշխարհում: Երաժիշտներից յուրաքանչյուրն ունի անվանական պարգևներ և մրցանակներ՝ հայրենիքն ըստ արժանվույն ներկայացնելով բազմաթիվ միջազգային բեմերում կայացած հյուրախաղերի ժամանակ:
2015 թ. նոյեմբերից Քառյակը պաշտոնապես հանդիսանում է լարային գործիքների համար լարեր և աքսեսուարներ արտադրող «D'addario Kaplan" - "D'Addario artist» ամերիկյան ընկերության տարածաշրջանային դեմքը: Beeline-ը Քառյակի մշտական գործընկերն է 2013թ.-ից:
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ:-0-
Ծանոթացեք լուրերին առաջինն ու քննարկեք դրանք մեր Telegram-ում
16:37 22.12.2016