Beeline–ը և ՄԶՀ-ն ամփոփեցին «Երեխաների խոսքի ուժը» ծրագրի արդյունքները

ԵՐԵՎԱՆ, 28 ապրիլի. /ԱՌԿԱ/.  «ԱրմենՏել» ՓԲԸ-ն (ապրանքանիշը` Beeline) և Մանկական զարգացման հիմնադրամը պարգևատրեցին «Երեխաների խոսքի ուժը» ծրագրի շրջանակում կայացած մրցույթի հաղթողներին և ամփոփեցին ծրագրի արդյունքները, հաղորդում է ընկերության մամուլի ծառայությունը։

Մրցույթի հաղթողների պարգևատրման արարողությունը տեղի է ունեցել Մանկական զարգացման հիմնադրամի գրասենյակում, որտեղ տեղադրված էին հաղթող երեխաների նկարները՝ իրենց ուղերձներով: Բոլոր հաղթողներին հանձնվել են պատվոգրեր և նվերներ: Ամփոփմանը ներկա էին Վայոց Ձորի, Արարատի, Տավուշի վեց համայնքների հաղթողները:

Հաղորդագրության համաձայն, «Երեխաների խոսքի ուժը» ծրագիրն իրականացվել է Արարատի, Վայոց Ձորի և Տավուշի մարզերի Նոր Խարբերդ, Այնթափ, Եղեգնաձոր, Վայք, Իջևան և Դիլիջան համայնքներում: Օգտագործելով ժամանակակից տեխնոլոգիաների հնարավորությունները` ծրագրի շրջանակում զարգացել է երեխաների և պատանիների ստեղծագործ, քննադատական և այլընտանքային մտածողությունը, բարձրացել է ծնողների և համայնքի բնակիչների իրազեկվածությունը երեխաների բարեկեցության վերաբերյալ։

Ծրագրին մասնակցել են ավելի քան 220 երեխաներ, 1500 ծնողներ և համայնքի բնակիչներ:

Հայաստանում Beeline-ի հասարակայնության հետ կապերի ղեկավար Նաիրա Նազարյանի խոսքով, Beeline–ն իր սոցիալական պատասխանատվության շրջանակում մշտապես իրականացնում է ծրագրեր, որոնք ուղղված են կրթության զարգացմանը և երեխաների աջակցմանը։ 

«Beeline-ի համար հատկապես կարևոր է այն ծրագրերի իրագործումը, որոնք թվային տեխնոլոգիական լուծումների միջոցով նպաստում են ապագայի կերտմանը: Ուրախ եմ, որ մեզ հաջողվեց այս ծրագրի շնորհիվ բազմաթիվ երեխաներին և նրանց ծնողներին օգնել փոխել իրենց կյանքը դեպի ավելի լավը» - նշել է նա:

Մանկական զարգացման հիմնադրամի տնօրեն Լուսինե Սիմոնյանը կարևորել է, երբ հեռավոր համայնքներում ապրող դեռահասներն ու երիտասարդները մասնակից են դառնում համայնքի զարգացմանը:

«Հաղթողների մտքերը, կարծիքները իրենց համայնքի վաղվա օրվա վերաբերյալ ևս մեկ անգամ հրավիրում է տեղական իշխանությունների ուշադրությունը համայնքնի խնդիրների վրա և ավելի պարտավորեցնող է դարձնում դրանց լուծումները: Beeline-ի հետ համատեղ մեր հիմնադրամը շարունակում է զարգացնել երեխաների մտածողությունը և կարողությունները, ու, կրթելով նրանց, ավելի բարեկեցիկ դարձնել նրանց կյանքը»,- ասել է նա:

«Երեխաների խոսքի ուժը» ծրագրի շրջանակում համայքների հետ ստորագրվել է նաև եռակողմ փոխըմբռնման հուշագրեր՝ ուղղված երեխաների պաշտպանության ոլորտում արդյունավետ եռակողմ համագործակցության գործընթացի խթանմանը Հայաստանում:

Հաղորդագրության մեջ նշվում է, որ Beeline-ը և Մանկական զարգացման հիմնադրամն իրականացնում են սոցիալական ծրագրեր սկսած 2011 թ.-ից: Համագործակցության շրջանակում ստեղծվել է «Մենք» մանկական ներառական թատերախումբը, ինչպես նաև անցկացվել են արտ-թերապիայի կուրսեր, որոնք նպաստում են երեխաների ինտեգրմանը հասարակություն: «Գիտելիք հանուն բարեկեցության» ծրագրի շրջանակում հիմնադրամին տրամադրվել է «0-8000-1007» վստահության հեռախոսահամարը, երկրի 10 դպրոցներում ու մանկապարտեզներում բացվել են «Beeline երեխաների զարգացման անկյուններ»` հատուկ կարիքներով երեխաների համար։

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ:-0-

Ծանոթացեք լուրերին առաջինն ու քննարկեք դրանք մեր Telegram-ում

17:53 28.04.2017