«ԱրմենՏելը» հայտարարում է «Զանգ զինակցին» ակցիայի մեկնարկի մասին

ԵՐԵՎԱՆ, 8 մայիսի. /ԱՌԿԱ/. «ԱրմենՏել» ՓԲԸ-ն (ապրանքանիշը Beeline) շնորհավորում է Հայրենական մեծ պատերազմի բոլոր վետերաններին Հաղթանակի օրվա առթիվ և հայտարարում «Զանգ զինակցին» տոնական ակցիայի անցկացման մասին, «ԱՌԿԱ» գործակալությանը հայտնեցին ընկերության մամուլի ծառայությունից: 

Ակցիայի շրջանակում մայիսի 9-ին Հաղթանակի զբոսայգում Հայրենական մեծ պատերազմի վետերանները հնարավորություն կունենան անվճար զանգահարելու իրենց մարտական ընկերներին, հարազատներին և մտերիմներին` աշխարհի ցանկացած երկիր:

Պաշտոնական միջոցառումներից հետո Հաղթանակի զբոսայգում «ԱրմենՏել» ընկերության ներկայացուցիչները շնորհավորելու են վետերաններին և առաջարկելու զանգահարել իրենց զինակիցներին, նրանց ընտանիքների անդամներին և շնորհավորել տոնի առթիվ: 

 

«Ուրախ եմ «ԱրմենՏել» ընկերության անունից շնորհավորել Հայրենական մեծ պատերազմի բոլոր վետերաններին Հաղթանակի օրվա առթիվ: «Զանգ զինակցին» տոնական ակցիայի անցկացումը մեր ընկերության համար դարձել է բարի ավանդույթ և շատ հաճելի է, որ այդ օրը յուրաքանչյուր վետերան կարող է հիշել հաղթանակները, կիսվել ուրախությամբ և շնորհավորել ընկերներին, նույնիսկ եթե նրանց բաժանում են հազարավոր կիլոմետրեր», - նշեց «ԱրմենՏել» ՓԲԸ Գլխավոր տնօրեն Իգոր Կլիմկոն:  

«Զանգ զինակցին» տոնական ակցիան կանցկացվի 2012թ-ի մայիսի 9-ին Երևանի Հաղթանակի զբոսայգում մինչև ժ. 15:00-ն:

«ԱրմենՏել» ՓԲԸ-ն (ապրանքանիշը՝ Beeline) հանդիսանում է «ՎիմպելԿոմ» ընկերությունների խմբի մի մասը: «ՎիմպելԿոմը» հանդիսանում է աշխարհի խոշորագույն ինտեգրված օպերատորներից մեկը, որն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման,  այնպես էլ լայնաշերտ ինտերնետ հասանելիության ծառայություններ: –0-