DigiTec 2014 բիզնես ֆորումը կանցկացվի Երևանում հունիսի 20–ից 21–ը
ԵՐԵՎԱՆ, 30 մայիսի. /ԱՌԿԱ/. Երևանում հունիսի 20–21–ը կայանալիք DigiTec 2014 յոթերորդ ամենամյա բիզնես ֆորումին կմասնակցի ավելի քան 50 ընկերություն և մոտ 3 հազար այցելու, ուրբաթ ասաց Ինֆորմացիոն տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը։
Նրա խոսքով` ֆորումի նպատակն է աջակցել բիզնեսի տարբեր ոլորտներին օպտիմալ տեխնոլոգիական լուծումներ փնտրելու գործում, ինչպես նաև օգնել տեխնոլոգիական ընկերություններին մեկ հարթակում հանդիպումներ կազմակերպելու և պոտենցիալ հաճախորդներին իրենց մշակումները ներկայացնելու գործում։
«Ակնկալվում է, որ ֆորումին կմասնակցի մոտ 50 ընկերություն և ավելի քան 3 հազար այցելու, որոնցից մոտ 500–ը ընկերությունների ղեկավարներ և թոփ–մենեջերներ են», – ասաց Վարդանյանն` ավելացնելով, որ օտարերկրյա հյուրերի մասնակցություն է սպասվում, մասնավորապես` ֆորումին կմասնակցի երեք ռուսական և մեկ վրացական ընկերություն ։
Նա նշեց, որ այս տարի միջոցառումը կանցնի մի շարք թեմաներով, որոնց թվում են զբոսաշրջություն, սպասարկում ու առևտուր, գյուղատնտեսություն ու վերամշակում, շինարարություն և լեռնահանքային արդյունաբերություն, ֆինանսաբանկային ոլորտ և էլեկտրոնային կոմերցիա, առողջապահություն, կրթություն, տրանսպորտ։
Վարդանյանի խոսքով`ներկայացված են բավականին լայն ոլորտներ` սկսած բիզնեսի կառավարմանը վերաբերող տարբեր լուծումներից մինչև բանկային և գյուղատնտեսական ոլորտի լուծումներ։
Նախատեսված է նաև բիզնես ասոցիացիաների ներկայացուցիչների խորհրդակցություն անցկացնել համագործակցության հնարավորությունների ուսումնասիրման և ջանքերի համախմբման համար`կառավարությանը միասնական դիրքորոշում և ծրագրեր ներկայացնելու նպատակով, որոնք վերաբերում են նաև հարկային դաշտի փոփոխություններին։
ՀՀ էկոնոմիկայի փոխնախարար Գարեգին Մելքոնյանն իր հերթին նշեց, որ ֆորումը լավ հարթակ կդառնա ոլորտի հետագա զարգացման համար։
«Առաջին տարին չէ, որ տեղեկատվական տեխնոլոգիաները ներառվում են կառավարության առաջնահերթությունների թվում և շարունակում են մնալ որպես բավականին հեռանկարային ոլորտ, որը զարգացման լավ ցուցանիշներ ունի», – ասաց Մելքոնյանը։
Այնուամենայնիվ, նրա խոսքով, կա էական չօգտագործված ներուժ և շուկայի համար լուծումների առաջարկներ, որոնք թույլ կտան խթանել այլ ոլորտների զարգացումն ու հասնել հաջող զարգացման` Հայաստանում բիզնեսի արդյունավետության բարձրացման նպատակով։
DigiTec 2014 յոթերորդ ամենամյա բիզնես ֆորումը կանցկացվի «Խելացի լուծումներ խելացի բիզնեսի համար» նշանաբանի ներքո։
Ֆորումի կազմակերպիչներն են Ինֆորմացիոն տեխնոլոգիաների ձեռնարկությունների միությունը (UITE) և «ԱրմենՏել» հեռահաղորդակցական ընկերությունը (ապրանքանիշը` Beeline)։ Բիզնես ֆորումն անցկացվում է ՀՀ վարչապետի բարձր հովանու ներքո։ Այս տարի բիզնես ֆորումին որպես հովանավոր միացել են նաև «ARinteg» ռուսական ընկերությունը և հայկական Կոնվերս բանկը։
DigiTec –2014 բիզնես ֆորումի տեղեկատվական հովանավորն է «ԱՌԿԱ» լրատվական գործակալությունը։
Ինֆորմացիոն տեխնոլոգիաների ձեռնարկությունների միությունը (UITE) հիմնադրվել է 2000 թ.–ին`այդ ոլորտի ընկերությունների տնտեսական շահերի պաշտպանության, բիզնեսի զարգացման խթանման, ՏՏ ոլորտի հետազոտությունների խրախուսման նպատակով։–0–
Ծանոթացեք լուրերին առաջինն ու քննարկեք դրանք մեր Telegram-ում
17:23 30.05.2014