Facebook–ը նոր ռեկորդ է սահմանել. մեկ օրում մեկ միլիարդ այցելություն

ԵՐԵՎԱՆ, 28 օգոստոսի. /ԱՌԿԱ/. Facebook սոցիալական ցանցից մեկ օրվա ընթացքում օգտված մարդկանց թիվն առաջին անգամ մեկ միլիարդի է հասել, հինգշաբթի հայտնել է ցանցի հիմնադիր Մարկ Ցուկերբերգը, գրում է Փրայմը։

«Մենք հաղթահարել ենք կարևոր սահմանագիծը։ Առաջին անգամ մեկ միլիարդ մարդ է օգտվել Facebook–ից մեկ օրվա ընթացքում։ Երկուշաբթի (օգոստոսի 25–ին) Երկրի յուրաքանչյուր յոթերորդ մարդը մտել է Facebook` ընտանիքի կամ ընկերների հետ կապ հաստատելու համար»,– իր էջում գրել է Ցուկերբերգը։

Ընկերության ֆինանսական հաշվետվության համաձայն, 2015 թվականի հունիսին ամեն օր ցանցից օգտվող ակտիվ օգտատերերի թիվը կազմել է միջինը 968 միլիոն։

Աշխարհի խոշորագույն Facebook սոցիալական ցանցի զուտ շահույթը, որը բաժին է ընկնում սովորական բաժնետոմսեր ունեցողներին, 2015 թվականի առաջին կիսամյակի արդյունքով, կազմել է 1.224 միլիարդ դրամ։

Facebook–ի ղեկավար Մարկ Ցուկերբերգը սոցցանցը ստեղծել էր բացառապես Հարվարդի համալսարանի ուսանողների շփման համար, սակայն շուտով դրա առավելությունները գնահատեցին սկզբում ԱՄՆ–ի մյուս բուհերի ուսանողները, այնուհետև` դպրոցականները, իսկ հետո նաև ամբողջ աշխարհի օգտատերերը։ Facebook ընկերությունը փետրվարին նշել է գործարկման 10 տարին` այդ ընթացքում ընկերությունը կարողացել է աշխարհի ամենամեծ սոցիալական ցացի կարգավիճակ ձեռք բերել։

Ծանոթացեք լուրերին առաջինն ու քննարկեք դրանք մեր Telegram-ում

14:26 28.08.2015