Facebook-ը կօգտագործի արհեստական ինտելեկտը` ֆեյքերը հայտնաբերելու համար
ԵՐԵՎԱՆ, 2 դեկտեմբերի. /ԱՌԿԱ/. Facebook սոցիալական ցանցը կօգտագործի արհեստական ինտելեկտը (artificial intelligence, AI) կեղծ նորությունների և ուղիղ տեսահեռարձակումներում բռնության տեսարաններ հայտնաբերելու համար, հաղորդում է The Wall Street Journal (WSJ)-ը` հղում անելով ընկերության ներկայացուցչին: ԱՄՆ-ում վերջին նախագահական ընտրություններին Facebook-ը, Twitter-ը և Google-ը խիստ քննադատության ենթարկվեցին թեկնածուներ Դոնալդ Թրամփի և Հիլարի Քլինթոնի մասին կեղծ նորություններ տարածելու համար:
Այդպիսի նորությունները Facebook-ում ավելի մեծ ծածկույթ էին ունենում, քան The New York Times-ի, The Washington Post-ի, The Huffington Post-ի և այլ պարբերականների իրական նորությունները: Buzzfeed-ի հաշվարկով այս տարվա փետրվար-նոյեմբերին 20 ամենաճանաչված կեղծ նորություններն ունեցել են 8,7 մլն վերահրապարակում, լայք և մեկնաբանություն, իսկ 20 լավագույն իրական նորությունները` 7,4 մլն: Կեղծ նորություններ էին հրապարակում, օրինակ, մակեդոնացի երիտասարներ, ովքեր ստեղծել են 140 կայք ամերիկյան քաղաքականության վերաբերյալ և միլիոնավոր դոլարներ աշխատել: Jumpshot վերլուծական ընկերության տվյալներով, կեղծ նորություններով կայքերի ծածկույթի կեսը ստացվում է հենց Facebook-ի շնորհիվ, գրում էր Quartz-ը: Քլինթոնի կողմնակիցները նույնիսկ մեղադրել են Facebook-ին նրանում, որ կեղծ նորություններն ազդել են ընտրությունների արդյունքների վրա:
Facebook-ի հիմնադիր Մարկ Ցուկերբերգը սկզբում հերքում էր նման ազդեցության հնարավորությունը, սակայն ի վերջո հայտարարեց կեղծ նորությունների հետ պայքարի ծրագրի մասին: Այս սոցիալական ցանցը, ինչպես և Google-ը, այլևս չի կիսելու գովազդից ստացված եկամուտն այն կայքերի հետ, որոնք կեղծ նորություններ են տարածում: Բացի այդ, Facebook-ը կտեղեկացնի օգտատերերին, եթե այս կամ այն նորությունը կասկածներ կառաջացնի, նշել է Ցուկերբերգը նոյեմբերին:
Ամբողջ աշխարհով Facebook-ի հարյուրավոր աշխատակիցներ արդեն իսկ զբաղվում են օգտատերերի հրապարակած կոնտենտի մոնիթորինգով։
Սակայն կեղծ նորությունների դեմ պայքարի համար դա բավական չէ, խոստովանում է ընկերությունը: Facebook-ն առայժմ պատրաստի որոշում չունի, թե ինչպես ընկերությունը կտարբերի ճիշտը ստից և ինչպես է դրանում օգնելու AI-ն, խոստովանել է ընկերության ներկայացուցիչը: Ամենայն հավանականությամբ, AI-ն կարձագանքի լուրերում առկա կոնկրետ բառերին, գրում է WSJ-ը: Կեղծ նորությունների բացահայտման համակարգի մասին Ցուկերբերգի հայտարարությունից հետո սոցիալական ցանցերի տասնյակ աշխատակիցներ տարատեսակ նախագծերից տեղափոխվել են այս խնդրի հրատապ լուծման վրա, գրում է պարբերականը` հղում անելով իր աղբյուրներին:
Ռուսական Vkontakte-ի (պատկանում է Mail.ru Group-ին) ներկայացուցիչը չկարողացավ օպերատիվորեն ներկայացնել կեղծ նորությունների վերաբերյալ վիճակագրությունը սոցիալական ցանցի ներսում, սակայն կասկածներ հայտնեց, որ դա զանգվածային բնույթ է կրում. նման խնդիր երբեք չի քննարկվել ընկերության ներսում: Նման վիճակագրություն չի հավաքում նաև «Յանդեքսը», ասել է ներկայացուցիչ Ասյա Մելքումովան. ծառայությունը չունի սեփական խմբագրությունը և նորությունների բովանդակություն ստուգելու հնարավորություն չունի:
2017 թ.-ից ուժի մեջ են մտնում այն լրացումները, որոնց համաձայն, նորությունների ագրեգատորները պատասխանատվություն կկրեն ոչ հավաստալի տեղեկատվություն տարածելու համար, եթե դա ԶԼՄ-ների հաղորդագրություն չէ: -0-
Ծանոթացեք լուրերին առաջինն ու քննարկեք դրանք մեր Telegram-ում
13:30 02.12.2016