Google-ը կմիանա ԱՄՆ-ի և Ճապոնիայի միջև նոր մալուխի անցկացման նախագծին

ԵՐԵՎԱՆ, 13 օգոստոսի. /ԱՌԿԱ/. Google կորպորացիան հայտարարել է, որ միանում է Խաղաղ օվկիանոսի հատակով անցնող նոր օպտիկամանրաթելային մալուխի անցկացման նախագծին, որը ստացել է FASTER անվանումը, հաղորդում է TechCrunch պորտալը:

Մալուխն իրար կկապի Ճապոնիան և ԱՄՆ-ի արևմտյան ափը՝ ապահովելով 60 Տբ/վ արագությամբ տվյալների փոխանցում: Նախագծին մասնակցում են նաև China Mobile International, China Telecom Global, Global Transit, KDDI և SingTel ընկերությունները, իսկ մատակարարն է NEC ընկերությունը: Նախագիծը կարժենա 300 մլն դոլար, հաղորդում է hitech.newsru.com-ը:

Ինչպես իր բլոգում նշել է Google-ի փոխնախագահ Ուրս Հոլցեն, ընկերությունը նախագծում ներդրումներ կկատարի՝ իր ապրանքներից օգտվողներին հուսալի կապով ապահովելու համար: Ակնկալվում է, որ նոր մալուխը շահագործման կհանձնվի 2016 թ.-ի երկրորդ եռամսյակում:

Սա առաջին դեպքը չէ, երբ ընկերությունը մասնակցում է նմանատիպ նախագծում: Այսպես՝ 2008 թ.-ին Google-ը ներառվեց մի կոնսորցիումում, որը ևս զբաղվում էր Ճապոնիայի և ԱՄՆ-ի միջև մալուխի անցկացմամբ: Այդ մալուխն 3,3 60 Տբ/վ արագությամբ տվյալների փոխանցում ապահովեց: Բացի այդ, ընկերությունը մասնակցել է նաև Ճապոնիայի և Չինաստանի միջև մալուխի անցկացման գործում, որն ավարտվեց նախորդ տարվա հունիսին:

Google-ը նաև ակտիվորեն զբաղվում է ողջ աշխարհում համացանցի ազատ հասանելիության ապահովմամբ՝ հաջողությամբ մրցակցելով Facebook սոցցանցի նմանատիպ նախագծի հետ: 2014 թ.-ի հունիսին հայտնի դարձավ, որ ընկերությունը կծախսի ավելի քան 1 մլրդ դոլար 180 արբանյակների ստեղծման և արձակման վրա, որոնք համացանցով կապահովեն երկրագնդի հեռավոր շրջանները:-0-

Ծանոթացեք լուրերին առաջինն ու քննարկեք դրանք մեր Telegram-ում

13:43 13.08.2014