Գորիսում մեկնարկել է Beeline-ի և Մանկական զարգացման հիմնադրամի «Գիտելիք հանուն բարեկեցության» ծրագիրը
ԵՐԵՎԱՆ, 17 նոյեմբերի. /ԱՌԿԱ/. Beeline-ը և Մանկական զարգացման հիմնադրամը հայտարարում են «Գիտելիք հանուն բարեկեցության» համատեղ ծրագրի անցկացման մասին։ Ծրագրի հերթական փուլն իրականացվել է Սյունիքի մարզի Գորիս քաղաքում «Այսօրվա աշխարհը երեխաների աչքերով» խորագրի ներքո։
«ԱրմենՏել» ՓԲԸ-ի հասարակայնության հետ կապերի բաժինը տեղեկացնում է, որ միջոցառումը մեկնարկել է «Ամեն ինչ սկսվում է խաղաղությունից» նկարչական ցուցահանդեսի բացմամբ, որից հետո տեղի է ունեցել թատերական ներկայացում Գորիսի թիվ 4 ավագ դպրոցի և Վազգեն Սարգսյանի անվան մանկապարտեզի սաների մասնակցությամբ։ Այնուհետև աշակերտները ներկայացրել են հատվածներ շարադրությունների մրցույթում հաղթած լավագույնը աշխատանքներից։
«Երեխաները մշտապես գտնվում եմ Beeline-ի ուշադրության կենտրոնում և այս տարվա ընթացքում իրականացված երեխայակենտրոն ծրագրերը ոչ միայն օգնեցին տասնյակ հազարավոր երեխաների կյանքը դարձնել ավելի լավը, այլև պարգևել նրանց դրական զգացմունքներ և վառ տպավորություններ։ Տեսնելով երեխաների ժպտացող աչքերը, խանդավառությունն ու ոգևորվածությունը կարող եմ հստակ ասել, որ մենք ճիշտ ուղի ենք ընտրել. մեր աջակցությունը լինելու է շարունակական և ամենուր՝ անգամ Հայաստանի ամենահեռավոր վայրերում», - նշել է Հայաստանում Beeline-ի Հասարակայնության հետ կապերի ծառայության ղեկավար Տաթև Այրումյանը։
«Մանկական Զարգացման Հիմնադրամը խթանում է երեխաների իրավունքների պաշտպանության գործընթացի զարգացումը Հայաստանում և կարևորում նման ծրագրերի նախաձեռնումը հատկապես մարզերում: Այսօրվա զարգացող աշխարհում հատկանշական մի շարք երևույթներ կան, ինչպիսիք են` անկայուն քաղաքական և տնտեսական վիճակը, գործազրկությունն ու աղքատությունը, որոնք իրենց արդյունավետ լուծումները պետք է գտնեն այսօրվա սերնդի հետ ակտիվ և առողջ աշխատանքի արդյունքում: Երեխաների պատկերացումների և զգացողությունների միջոցով մենք փորձում ենք վերոնշյալ խնդիրների վրա հրավիրել հանրության և որոշում կայացնողների ուշադրությունը, և հավատացած ենք, որ երեխաների մեջ մարդասիրական որակներ սերմանելն ու զարգացնելը կապահովեն աշխարհում երեխաների անվտանգությունն ու բարեկեցությունը ապագայում»,- ասել է Մանկական զարգացման հիմնադրամի տնօրեն Լուսինե Սիմոնյանը։
Ընդհանուր առմամբ, «Այսօրվա աշխարհը երեխաների աչքերով» միջոցառմանը մասնակցել է ավելի քան 400 երեխա, իսկ հատուկ հանձնաժողովի ընտրած լավագույն շարադրությունների և նկարների հեղինակները պարգևատրվել խրախուսական մրցանակներով:
Beeline-ը համագործակցում է Մանկական զարգացման հիմնադրամի հետ 2011 թվականի ապրիլից։ Համագործակցության շրջանակում ստեղծվել է հատուկ կարիքներ ունեցող երեխաներից և հանրակրթական դպրոցներում սովորող երեխաներից բաղկացած «Մենք ենք» թատերախումբը: Իսկ «Գիտելիք հանուն բարեկեցության» ծրագրի շրջանակում Արարատի մարզի Այնթափ համայնքի մանկապարտեզում և Նոր Խարբերդի թիվ 2-րդ դպրոցում բացվել են «Beeline երեխաների զարգացման անկյուններ» հատուկ կարիքներ ունեցող երեխաների համար:
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–
Ծանոթացեք լուրերին առաջինն ու քննարկեք դրանք մեր Telegram-ում
14:47 17.11.2014