Հայաստանի բնակիչների մոտ 70%–ը մինչև հիմա չի օգտվում սմարթֆոններից. «ՎիմպելԿոմ Լթդ»
ԵՐԵՎԱՆ, 19 մայիսի. /ԱՌԿԱ/. «ՎիմպելԿոմ Լթդ» ընկերության անցկացրած ուսումնասիրությունների համաձայն, Հայաստանի բնակիչների մոտ 70 տոկոսը մինչև հիմա չի օգտվում սմարթֆոններից, երեքշաբթի լրագրողներին Երևանում ասաց «ՎիլմպելԿոմ Լթդ» խմբի բջջային սարքերի բաժնի ղեկավար Անդրեյ Չուկաևը։
Նրա խոսքով` նշանակում է, որ կան ընկերության արտադրանքի իրացման պոտենցիալ հնարավորություններ։
Նա նշեց, որ տարբեր շուկաներում բնակչության միայն 20–40 տոկոսն է օգտվում սմարթֆոններից, և հետևաբար, գոյություն ունի տվյալների փոխանցման ոլորտում օգտատերերի բազայի ավելացման հսկայական ներուժ։
«Հասանելի սարքերի առաջխաղացումը գլոբալ ռազմավարության մի մասն է, որն ընկերությունն իրականացնում է գործունեության բոլոր շուկաներում, և կարծում եմ, որ հայկական շուկայում մենք ունենք մեծ և չիրագործված ներուժ», – ասաց Չուկաևը։
«ԱրմենՏել» ընկերության տվյալներով` սմարթֆոնների ներթափանցումն ընկերության մոտ վերջին 4 ամսում աճել է 4 տոկոսով, իսկ 10 ամսում` 10 տոկոսով, միաժամանակ ողջ շուկայում այդ փոփոխությունն ընդհանուր առմամբ կազմել է համապատասխանաբար 2,5 և 6,8 տոկոս։
Ընկերության վաճառքի ծավալում սմարթֆոնների մասնաբաժինը 2015թ.–ի ապրիլին կազմել է 87 տոկոս, մարտին` 45 տոկոս։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0 –
Ծանոթացեք լուրերին առաջինն ու քննարկեք դրանք մեր Telegram-ում
21:26 19.05.2015