Հայաստանի ՏՏ ոլորտում ակնկալվում է 28-30%–ի աճ. վարչապետ

ԵՐԵՎԱՆ, 2 փետրվարի. /ԱՌԿԱ/. Հայաստանի ՏՏ ոլորտում ակնկալվում է 28-30 տոկոսի աճ, հայտնել է Հայաստանի վարչապետ Կարեն Կարապետյանը «Թվային օրակարգը գլոբալիզացիայի դարաշրջանում» Ալմաթիում անցկացված միջազգային համաժողովում։

«Հայաստանում տեղեկատվական տեխնոլոգիաների ոլորտն ակտիվ զարգանում է։ Վերջին տարիներին այդ ոլորտում մենք 25–տոկոսանոց տարեկան աճ ենք ապահովել։ Մենք դեռ չենք ամփոփել նախորդ տարվա արդյունքները, բայց ակնկալում ենք մոտ 28-30 տոկոսանոց աճ»,– ասաց նա։ 

Ինչպես հայտնում է կառավարության մամուլի ծառայությունը, ներկայացրել է Հայաստանի թվային օրակարգը և ընդգծել, որ թվային վերափոխումը ոչ միայն քայլ է դեպի տեխնոլոգիական առաջընթաց, այլև միակ հնարավորությունն է՝ կարճ ժամանակահատվածում դառնալու արդյունավետ կառավարմամբ և տնտեսությամբ երկիր, ու այստեղ մեզ համար այլընտրանքներ չկան:

Անդրադառնալով Հայաստանի թվային օրակարգին՝ վարչապետն ասել է, որ ներկայում թվային արագընթաց առաջխաղացումն իրականացվում է թվային փոխակերպման 6 հիմնական ուղղություններով՝ թվային կառավարություն, թվային հմտություններ, ենթակառուցվածք, կիբերանվտանգություն, մասնավոր հատված, ինստիտուցիոնալ հիմքեր:

«Ազգային թվային օրակարգի առաջխաղացման արդյունավետ համակարգման նպատակով Հայաստանի կառավարությունը 2017 թվականին հիմնել է «Թվային Հայաստան» հիմնադրամը, մշակվել է «Հայաստանի թվային փոխակերպման օրակարգ 2018-2030 թթ.» զարգացման ծրագիրը: Թվային օրակարգի համաձայն՝ մինչև 2030 թ. «պետություն-բիզնես» ծառայությունների գծով մտադիր ենք հասնել 100 տոկոսանոց ցուցանիշի և 80 տոկոսանոց թվային փոխգործակցության «պետություն-բիզնես» ծառայությունների գծով»,- հայտարարել է Կարեն Կարապետյանը:

Իր խոսքում վարչապետն անդրադարձել է նաև կրթական ոլորտին՝ նշելով, որ Հայաստանի բոլոր, անգամ հեռավոր շրջանների դպրոցներում շախմատը որպես ուսումնական առարկա է դասավանդվում, ինչպես նաև ուսուցանվում են ռոբոտատեխնիկա և տեղեկատվական տեխնոլոգիաներ, իսկ այս տարվանից՝ բիզնես և ֆինանսներ:

Կարեն Կարապետյանը խոսել է նաև ԹՈՒՄՈ ստեղծարար տեխնոլոգիաների կենտրոնի մասին՝ նշելով, որ 2016 թվականին այն աշխարհի լավագույն նորարարական դպրոց է ճանաչվել, և ներկայում կենտրոնն ընդլայնվում է ոչ միայն երկրի ներսում, այլև նրա սահմաններից դուրս: Վերջերս Փարիզի քաղաքապետարանն է հայտարարել իրենց մոտ նման կենտրոն բացելու մասին:

Համաժողովին մասնակցել են Եվրասիական տնտեսական միության մասնակից երկրների կառավարությունների ղեկավարներ, միջազգային փորձագետներ և բարձր տեխնոլոգիաների բնագավառի մասնագետներ։ -0-

Ծանոթացեք լուրերին առաջինն ու քննարկեք դրանք մեր Telegram-ում

16:11 02.02.2018