iPhone–ի անսարքության պատճառով բրիտանացու բջջային հեռախոսի հաշիվը 30 հազար դոլար է կազմել

ԵՐԵՎԱՆ, 8 դեկտեմբերի. /ԱՌԿԱ/.  Բջջային կապից օգտվելու համար բրիտանական Թիլբյուրի քաղաքի բնակիչ Քրիս Բովիսից ահռելի գումար են պահանջել` £19 հազար, որը ավելի քան 30 հազար դոլար է կազմում։ Ինչպես երկուշաբթի հայտնել է Evening Standard թերթը, բրիտանացին այդ մասին իմացել է այն ժամանակ, երբ փորձել է պարզել, թե ինչու են անջատել կապը։

Բովիսին հայտնել են, որ համացանցից մշտապես օգտվելու համար նրա հաշիվը £8,9 հազար է կազմել /$14,24 հազար/։Նրան զգուշացրել են, որ հաջորդ հաշիվը  £10 հազար /$16 հազար դոլար/ կկազմի։ Նման պահանջներին ի պատասխան բրիտանացին ծիծաղել է և խնդրել անջատել իր iPhone–ը։ Չնայած դրան` տվյալների հսկայական ծավալների բեռնումը չի դադարել։ Ավելի ուշ պարզ է դարձել, որ բջջային օպերատորը փորձել է Բովիսի բանկային հաշվից հանել համապատասխան գումարը, սակայն տրանզակցիան արգելափակվել է։

Սմարթֆոնը ստուգման նպատակով ուղարկվել է Apple–ի խանութ, որտեղ ընկերության աշխատակիցները հաստատել են, որ iPhone–ը խնդիրներ ունի։ Սարքը փոխարինել են նորով։ Բջջային օպերատորը սկզբում Բովիսից պահանջել է £300` 480 դոլար, իսկ ավելի ուշ ներողություն է խնդրել և առհասարակ հրաժարվել ներկայացրած պահանջներից։-0-

Ծանոթացեք լուրերին առաջինն ու քննարկեք դրանք մեր Telegram-ում

11:40 08.01.2013