Orange hիմնադրամը 52 միլիոն դրամ կներդնի Տավուշի մարզի սոցիալ-տնտեսական ծրագրերի բարելավման համար։
ԵՐԵՎԱՆ, մայիսի 27. /ԱՌԿԱ/. Orange Հիմնադրամը 52 միլիոն դրամ կներդնի Տավուշի մարզի սահմանամերձ Պառավաքար գյուղում սոցիալ-տնտեսական ծրագրերի բարելավման համար, հաղորդում է ընկերության մամուլի ծառայությունը։
Ներդրումները կիրականացվեն «Մեկ գյուղ» նախագծի շրջանակներում, որն անցկացվում է արդեն երկրորդ անգամ:
«Մեկ գյուղ» նախաձեռնությունն ուղղված է ընտրված մեկ գյուղական համայնքի տնտեսական գործունեության և սոցիալական ենթակառուցվածքների բարելավմանը:
Պառավաքարում, որտեղ բնակչության 95%-ը զբաղվում է խաղողագործությամբ, իրականացվող «Մեկ գյուղ» նախագծի շրջանակներում ստեղծվել է գյուղատնտեսական կոոպերատիվ:
Համայնքում խաղողագործության արդյունավետությունը բարձրացնելու նպատակով արդեն տրամադրվել է խաղողի այգիները մշակելու համար հատուկ նախատեսված ժամանակակից տրակտոր, ինչպես նաև ոռոգման, վարման, խաղողի տնկիներն էտելու և մշակելու համար անհրաժեշտ սարքավորումներ:
Ֆինանսական միջոցներ կհատկացվեն հավելյալ 25 հա հողատարածք ոռոգելու համար, ինչը թույլ կտա ընդլայնել խաղողի այգիները և օգտագործել ջրի սղության հետևանքով նախկինում անմշակ հողատարածքը:
«Մեկ գյուղ» նախագծի շրջանակում կվերանորոգվի գյուղի մանկապարտեզը, ինչը հնարավորություն կտա կրկնապատկել մանկապարտեզ հաճախող երեխաների թիվը, բացի այդ, ընդհանուր առմամբ 4տ տարողությամբ ջրային տարաների տեղադրման միջոցով կլուծվի մանկապարտեզի խմելու ջրի խնդիրը: Խմելու ջրի մատակարարումը կվերականգնվի նաև համայնքի դպրոցի սաների և գյուղի բնակիչների համար:
Ծրագրով նախատեսվում է նաև ֆուտբոլի խաղահրապարակի կառուցում:
Ծրագրի շրջանակներում ֆինանսական և մարդկային ռեսուրսներ կուղղվեն Պառավաքարի, ինչպես նաև հարևան Վարագավան և Վերին Ծաղկավան համայնքների` ընդհանուր հաշվով 3200 բնակիչներին սպասարկող բժշկական ամբուլատորիայի վերանորոգմանն ու սարքավորումներով հագեցմանը:
«Գյուղական համայնքներն ու դրանց առօրյա խնդիրները՝ հատկապես կայուն տնտեսական գործունեության բացակայությունն ու աշխատատեղերի սղությունը, մշտապես Orange Հիմնադրամի ուշադրության կենտրոնում են: «Մեկ գյուղ» նախաձեռնության միջոցով, որն առաջին անգամ իրականացրել ենք անցյալ տարի Հարթավանում, նպատակ ունենք զգալի և շոշափելի արդյունքների հասնել: Իր աշխարհագրական դիրքով պայմանավորված՝ սահմանից ընդամենը 2 կմ հեռավորության վրա գտնվող Պառավաքար համայնքը բավական խոցելի է։ Մենք մեծ հույսով ձեռնարկում ենք այս նախաձեռնությունը՝ նպատակ ունենալով էականորեն նպաստել գյուղի բնակիչների կյանքի պայմանների բարելավմանը»,- ասաց Orange Արմենիա հիմնադրամի խորհրդի նախագահ Ֆրանսիս Ժելիբտերը:
Orange Հիմնադրամի հիմնական առաքելությունն է աջակցել հասարակության խոցելի խմբերին, շփման հնարավորություն ընձեռելով, ինչպես նաև աջակցել գյուղական համայնքների կայուն զարգացման նպատակով։ Հիմնադրամն աջակցում է բարեգործական ծրագրերի իրականացմանը երեք հիմնական ուղղություններով` կրթություն, առողջապահություն և համայնքների զարգացում։
Ֆրանս Տելեկոմ Խմբի անդամ Օրանժ Արմենիան Հայաստանում շարժական հեռախոսակապի և ինտերնետի ծառայություններ է մատուցում 2009թ. նոյեմբերի 5-ից: Ընկերությունը Հայաստանում մինչև օրս կատարել է մոտ 250 միլիոն եվրոյի ներդրումներ (ներառյալ` արտոնագիր ստանալու համար) և արդեն բջջային կապի ու լայնաշերտ շարժական ինտերնետի հասանելիություն է ապահովում Հայաստանի 600 քաղաքներում և գյուղերում` բնակչության ավելի քան 95% տոկոսին:
--0-
Ծանոթացեք լուրերին առաջինն ու քննարկեք դրանք մեր Telegram-ում
21:30 27.05.2015