Orange հիմնադրամը 2015թ.–ին 26 մլն դրամ է հատկացրել «Լույս հայի աչքերին» ծրագրին
ԵՐԵՎԱՆ, 26 մարտի. /ԱՌԿԱ/. Orange հիմնադրամը 2015թ.–ին 26 մլն դրամ է հատկացրել «Լույս հայի աչքերին» ծրագրին, ասվում է «Orange Armenia» մամուլի ծառայության հաղորդագրության մեջ։
Մարտի 20–ին Orange-ը և Հայկական ակնաբուժական նախագծի հիմնադրամը հայտարարել են «Լույս հայի աչքերին» ծրագրի մեկնարկի մասին, որի շրջանակներում Կոտայքի, իսկ այնուհետև Լոռու, Շիրակի և Արագածոտնի մարզերի բնակիչները կարող են օգտվել անվճար ակնաբուժական ծառայություններից:
Նշված մարզերի բնակիչները նախ կհետազոտվեն տեղի ակնաբույժների կողմից, որից հետո, անհրաժեշտության դեպքում, կուղեգրվեն Աչքի շարժական հիվանդանոց, որտեղ Մալայանի անվան ակնաբուժական կենտրոնի և այլ առաջատար կենտրոնների մասնագետներից կազմված ՀԱՆ-ի ակնաբուժական խմբերն անվճար հիմունքներով կիրականացնեն խորացված ստուգումներ, վիրահատություններ և լազերային բուժումներ:
Տարվա ընթացքում նախատեսվում է հետազոտել շուրջ 16,500 մեծահասակաների և երեխաների և տրամադրել ավելի քան 1,000 ակնոց: Շարժական հիվանդանոցը պատրաստ է իրականացնել ավելի քան 1,100 վիրահատություն և լազերային բուժում:
Ակնային զննումներին զուգահեռ մարզերի դպրոցներում երեխաների համար կազմակերպվելու են նաև ակնային խնամքի վերաբերյալ հանրակրթական դասընթացներ:
«Արդեն հինգերորդ տարին է, ինչ Հայկական ակնաբուժության նախագծի հետ համատեղ Orange Հիմնադրամն իրականացնում է «Լույս հայի աչքերին» ծրագիրը: Շնորհիվ այս համագործակցության և նորարար շարժական աչքի հիվանդանոցի՝ այս ժամանակահատվածում ավելի քան 67,000 մարդ արդեն հասցրել է օգտվել անվճար որակյալ ակնաբուժական ծառայություններից Հայաստանի բոլոր մարզերում: Հպարտ ենք աջակցել այս նախաձեռնությանը, քանի որ այն իսկապես շոշափելիորեն փոխում է մարզերի բնակիչների և նրանց ընտանիքների կյանքը՝ մասնավորապես նրանց հնարավորություն տալով անվճար օգտվել որակյալ ակնաբուժական ծառայություններւց, որոնք այլ կերպ հասանելի չէին լինի սոցիալապես խոցելի բնակիչներին և ընտանիքներին», - ասաց Orange Հիմնադրամի խորհրդի նախագահ Ֆրանսիս Ժելիբտերը:
Շարժական հիվանդանոցի առաջին կանգառը Կոտայքի մարզի Եղվարդ քաղաքն է, որտեղ այն կկայանի մարտի 30-ից մինչև ապրիլի 4-ը, իսկ այնուհետև կուղևորվի Աբովյան (ապրիլի 6-18) և Հրազդան (ապրիլի 20-ից մայիսի 8-ը) քաղաքներ: Կոտայքի մարզի բնակիչներն արդեն անցել են աչքի անվճար հետազոտություն տեղի ակնաբույժների կողմից:
«Այս տարի ՀԱՆ-ի և Orange Հիմնադրամի համագործակցության շնորհիվ Աչքի շարժական հիվանդանոցը կայցելի չորս մարզեր: «Լույս հայի աչքերին» ծրագրի շարունակական իրականացումը հնարավոր է դառնում այնպիսի գործընկերների շնորհիվ, ինչպիսին Orange Հիմնադրամն է»,– ասաց ՀԱՆ–ի հայկական գրասենյակի ղեկավար Նունե Եղիազարյանը։
Հայկական ակնաբուժության նախագծի և Orange Հիմնադրամի համագործակցության շնորհիվ 2011 թվականից ի վեր հետազոտվել է ավելի քան 51,984 մեծահասակ և 15,051 երեխա, շարժական հիվանդանոցում խորացված ստուգումներ է անցել 8,961 բնակիչ, իրականացվել է 5,209 վիրահատություն և լազերային բուժում, տրամադրվել է 23,876 ակնոց և 53 մարզային դպրոցների 4,399 աշակերտների համար կազմակերպվել են ակնային խնամքի վերաբերյալ հանրակրթական դասընթացներ:
Orange հիմնադրամի հիմնական առաքելությունը հասարակության խոցելի շերտերի աջակցությունն է շփման հնարավորությունների տրամադրման միջոցով, ինչպես նաև գյուղական համայնքների կայուն զարգացմանն օժանդակելը։ Հիմնադրամն աջակցում է բարեգործական ծրագրերի իրականացմանը երեք հիմնական ուղղություններով` կրթություն, առողջապահություն և համայնքների զարգացում։
Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 95 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:12 26.03.2015