«Orange Armenia» ՓԲԸ–ն բանկերում կգրավադրի իր բաժնետոմսերի 100 տոկոսը

ԵՐԵՎԱՆ, 7 հոկտեմբերի. /ԱՌԿԱ/. Հայաստանի հանրային ծառայությունները կարգավորող հանձնաժողովը հոկտեմբերի 9–ին նախատեսված նիստի ժամանակ կքննարկի որոշման նախագիծ, որը թույլ է տալիս «Orange Armenia» ՓԲԸ–ին հայկական բանկերում գրավադրել ընկերության բաժնետոմսերի 100 տոկոսը։

Ինչպես նշվում է ՀԾԿՀ–ի որոշման նախագծում, Ucom ընկերությունը, որը Orange Armenia ընկերության բաժնետոմսերի 100 տոկոսի սեփականատերն է, նախատեսում է բաժնետոմսերի 20 տոկոսը գրավադրել Արարատբանկում, 51 տոկոսը` Արդշինբանկում, իսկ 29 տոկոսը` Ամերիաբանկում։

Բաժնետոմսերի գրավադրման պատճառները չեն նշվում։

ՀԾԿՀ–ն օգոստոսի 20–ին հավանություն է տվել France Telecom–ին (Orange ապրանքանիշ) պատկանող «Orange Armenia» ՓԲԸ–ի բաժնետոմսերի 100 տոկոսի օտարմանը` Ucom ընկերության օգտին։ Բաժնետոմսերի 100 տոկոսի օտարման մասին Orange Armenia ընկերության որոշումը կապված է Orange խմբի ռազմավարության հետ։ Գործարքն ավարտվել է սեպտեմբերի 3–ին։

Ինչպես ավելի վաղ հայտարարել էր Orange Armenia ընկերության գլխավոր տնօրեն Ֆրանսիս Ժելիբտերը, բաժնետոմսերի վաճառքի մասին որոշումը կապ չունի ֆինանսական պատճառների հետ, այն կապված է բաժանորդներին կոնվերգենտային, այդ թվում` ֆիքսված կապի և հեռուստատեսության ծառայություններ տրամադրելու ցանկության հետ։

Միաժամանակ Оrange Armenia–ն կմնա որպես բջջային օպերատոր, կպահպանի արտոնագրերն ու ենթակառուցվածքը` շարունակելով ծառայություններ տրամադրել բաժանորդներին։

Աուդիտորական հաշվետվության համաձայն` «Оrange Armenia» ընկերությունը 2014 թ.–ին կրել է 4 մլրդ դրամի վնաս` 2013 թ.–ին գրանցված 3,85 մլրդ դրամի վնասի համեմատ։ 2014 թ.–ի վերջի տվյալներով` Orange Armenia–ի ներդրումները հանրապետությունում իրականացրած հնգամյա գործունեության ընթացքում գերազանցել են 100 մլրդ դրամը։

«Յուքոմ» (Universal Communications, ունիվերսալ կապ) ընկերությունը հիմնադրվել է 2007 թվականին և զբաղվում է հեռահաղորդակցային ծառայությունների մատուցմամբ։ Ericsson–ի օժանդակությամբ, ընկերությունը ստեղծել է լայնաշերտ հասանելիության ցանց` մատուցելով ինտերնետ, IP-հեռուստատեսության և ֆիքսված հեռախոսակապի ծառայություններ: Ericsson-ի հետ համատեղ ընկերությունը ստեղծել է լայնաշերտ հասանելիության ցանց՝ տրամադրելով ինտերնետի, IP-հեռուստատեսության և հեռախոսային ծառայություններ: –0–  

Ծանոթացեք լուրերին առաջինն ու քննարկեք դրանք մեր Telegram-ում

11:46 07.10.2015