Orange Armenia–ն 42 Մբ/վրկ արագությամբ H+ ցանց է ներդրել Հայաստանի 315 բնակավայրերում
ԵՐԵՎԱՆ, 24 հունվարի. /ԱՌԿԱ/. Orange Armenia–ն 42 Մբ/վրկ արագությամբ H+ ցանց է ներդրել Հայաստանի 315 բնակավայրերում, ուրբաթ մամուլի ասուլիսում հայտարարեց Orange Armenia–ի գլխավոր տնօրեն Ֆրանսիս Ժելիբտերը։
«Orange Armenia ընկերությունը հետևողականորեն նորարարությունների ներդրման աշխատանքներ է իրականացրել, որոնց հաշվին իր ցանցում ապահովել է բեռնման մինչև 21.6 Մբ/վրկ արագություն, իսկ հինգ խոշոր քաղաքներում` մինչև 42 Մբ/վրկ»,– ասաց Ժելիբտերը։
Ըստ նրա` 600 բազային կայանների տեղադրման, վերազինման և արդիականացման տեխնիկական մեծածավալ աշխատանքները թույլ են տվել ապահովել բեռնման մինչև 42 Մբ/վրկ արագությունը Հայաստանի 315 բնակավայրերում։
Ժելիբտերը նշեց, որ նոր ցանցը կապահովի բնակչության 90 տոկոսի ծածկույթը` հնարավորություն ընձեռելով օգտվել գերարագ ինտերնետից ոչ միայն մայրաքաղաքի, այլ նաև հեռավոր մարզերի բնակիչներին։
Orange Armenia–ի մարքեթինգի տնօրեն Արամ Մկրտչյանի խոսքով, H+ ցանցը հիմնվում է 3G տեխնոլոգիայի վրա և մինչև բեռնման 42 Մբ/վրկ արագության հաշվին թույլ է տալիս իրականացնել նույնիսկ մեծ ֆայլերի բեռնում, միաժամանակ ներբեռնել մի քանի ֆիլմեր, ապահովում է կայքերի գերարագ հասանելիություն։
42 Մբ/վ ինտերնետ մոդեմը կարելի է ձեռք բերել սկսած 1 դրամից` 11 հազար դրամ ամենամսյա սակագնով տարեկան բաժանորդագրման դեպքում։ Միաժամանակ, առանց տարեկան բաժանորդագրման մոդեմի գնման դեպքում դրա գինը կկազմի 50 հազար դրամ։
«Ներկայում մենք աշխատանքներ ենք կատարում և դիտարկում ենք սակագնային փաթեթների փոփոխության հնարավորություններն այդ ուղղությամբ, որ ծառայությունն ավելի հասանելի դարձնի բնակչության համար ոչ միայն Հայաստանի խոշոր քաղաքներում, այլ նաև մարզերում»,– ասաց Մկրտչյանը։
Ֆրանս Տելեկոմ Խմբի անդամ Օրանժ Արմենիան Հայաստանում շարժական հեռախոսակապի և ինտերնետի ծառայություններ է մատուցում 2009թ. նոյեմբերի 5-ից: Ընկերությունը Հայաստանում մինչ օրս կատարել է մոտ 250 միլիոն եվրոյի ներդրումներ (ներառյալ` լիցենզիայի ձեռքբերման համար) և արդեն ապահովում է բջջային կապի ու լայնաշերտ շարժական ինտերնետի հասանելիությունը Հայաստանի 600 քաղաքներում և գյուղերում` բնակչության ավելի քան 95% տոկոսին: --0--
Ծանոթացեք լուրերին առաջինն ու քննարկեք դրանք մեր Telegram-ում
18:54 24.01.2014