Orange Armenia–ն ընդլայնել է «Orange Կինո» ծառայությունն իր բաժանորդների համար
ԵՐԵՎԱՆ, 26 նոյեմբերի. /ԱՌԿԱ/. Orange Armenia բջջային օպերատորի ձայնային ծառայությունների բոլոր բաժանորդները կարող են չորեքշաբթի օրերին մեկ տոմսի գնով ձեռք բերել «Մոսկվա» և «Սինեմա Սթար Արմենիա» կինոթատրոններում ցուցադրվող ֆիլմերի երկու տոմս, լրագրողներին տեղեկացրեց Orange Armenia-ի գլխավոր տնօրեն Ֆրանսիս Ժելիբտերը։ «Այսուհետ հայկական և արտասահմանյան ֆիլմերն ավելի հասանելի կդառնան մեր բաժանորդների համար։ Կինոն սկզբից եղել է մեր ընկերության առաջնահերթ ուղղությունը։ Մենք կարծում ենք, որ ֆիլմերը հետաքրքիր է դիտել մտերիմների և հարազատների հետ և ուրախ ենք նպաստել դրան», – ասաց Ժելիբտերը չորեքշաբթի մամուլի ասուլիսի ժամանակ։ Նրա խոսքերով` եթե ավելի վաղ ծառայությունը վերաբերում էր միայն «Մոսկվա» կինոթատրոնի ուրբաթ օրերի ցուցադրություններին, ապա հիմա կինոթատրոնների ցանկին է միացել նաև «Սինեմա Սթար Արմենիան»։ Սակայն օպերատորի ծառայություններն այսուհետ կգործեն միայն չորեքշաբթի օրերին։ Այս ակցիայից կարող են օգտվել «Orange կանխավճարային», «Ամսական» և «Բիզնես» սակագնային պլանների բաժանորդները։ Ծառայությունն ակտիվացնելու համար հարկավոր է շաբաթվա ցանկացած օր 5555 համարին ուղարկել sms հաղորդագրություն` նշելով «kino» բառը, ստանալ ութանիշ ծածկագիր, որն անհրաժեշտ է ներկայացնել կինոթատրոնի տոմսարկղ առաջիկա չորեքշաբթի օրը և ստանալ այդ չորեքշաբթի ցուցադրվող ցանկացած ֆիլմի երկու տոմս` վճարելով մեկի համար։ Կարճ հաղորդագրության արժեքը սահմանված է բաժանորդի սակագնային պլանին համապատասխան։ Orange Armenia–ի հեռահաղորդակցության և ապրանքանիշի զարգացման գծով տնօրեն Արամ Մկրտչյանը նշեց, որ ծածկագիրը կարելի է ներկայացնել միայն մեկ անգամ, իսկ ակցիան գործում է միայն մեկ կինոդիտման համար։ «Սինեմա Սթար Արմենիա» կինոթատրոնի տնօրեն Հրաչյա Արշակյանն իր հերթին նշեց, որ կինոթատրոնը տոնում է իր գործունեության մեկ տարին և այդ ժամանակահատվածում իր հարկի տակ է ընդունել շուրջ 210 հազար այցելու։ Կինոթատրոնում ցուցադրվել է ավելի քան 240 ֆիլմ։ «Նախատեսվում է 2015 թ.–ի չորրորդ եռամսյակում Երևանում բացել «Սինեմա սթար» ցանցի նոր կինոթատրոն», – ասաց Արշակյանը։ Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։–0–
Ծանոթացեք լուրերին առաջինն ու քննարկեք դրանք մեր Telegram-ում
16:50 26.11.2014