Orange սակագնային փաթեթների նոր բաժանորդները կարող են երկու հեռախոս և SIM-քարտ ստանալ
ԵՐԵՎԱՆ, 21 օգոստոսի. /ԱՌԿԱ/. Օգոստոսի 21-ից սեպտեմբերի 30-ը Orange-ն առաջարկում է առաջին 5000 բաժանորդներին, ովքեր կմիանան Դելֆին, Թիթեռ կամ Պանտերա ամսական բաժանորդագրություններից որևէ մեկին 24 ամսով, ձեռք բերել մեկ հեռախոս հատուկ գնով, ինչպես նաև SIM–քարտ»,– չորեքշաբթի մամուլի ասուլիսի ընթացքում հայտնեց Orange Armenia–ի գլխավոր տնօրեն Ֆրանսիս Ժելիբտերը։
«Նրանց նաև կտրամադրվի երկրորդ հեռախոսը մեկ դրամով` որպես նվեր ընտանիքի անդամներից մեկի համար։ Երկրորդ հեռախոսը, որն արտադրված է Alcatel ընկերության կողմից, ունի 2 ՄՊ ֆոտոխցիկ և բջջային ինտերնետից օգտվելու հնարավորություն»,– ասաց նա։
Բացի այդ, երկրորդ հեռախոսի հետ բաժանորդներն անվճար կստանան կանխավճարային SIM քարտ, որով հնարավոր կլինի մեկ ամիս շարունակ անվճար զանգահարել հիմնական հեռախոսահամարին ու Orange-ի ծառայություններից օգտվող ընտանիքի ևս երկու անդամի, իսկ առաջին ամսվա ավարտից հետո՝ շարունակել զանգահարել վերջիններիս անսահմանափակ՝ օրական վճարելով ընդամենը 20 դրամ:
Մարքեթինգի տնօրեն Արամ Մկրտչյանն իր հերթին հայտնեց, որ տրամադրվող հեռախոսներից մեկը կլինի սև, որը նախընտրում են տղամարդիկ, իսկ մյուսը նախատեսված կլինի կանանց համար` մարջանագույն։
«Orange Armenia» - ն France Telecom (Orange ապրանքանիշ) 100–տոկոսանոց դուստրն է, հայկական շուկա է դուրս եկել 2009 թվականի նոյեմբերի 5–ին` ապահովելով ցանցի 95–տոկոսանոց ծածկույթ և բջջային ու ինտերնետ կապ հանրապետության 600 համայնքներում։ ($1 –ը` 406,35 դրամ)-0-
Ծանոթացեք լուրերին առաջինն ու քննարկեք դրանք մեր Telegram-ում
18:11 21.08.2013