«Ռոստելեկոմը» հրավիրում է ուսանողներին մասնակցելու ընկերության ամենամյա նախագծին
ԵՐԵՎԱՆ, 23 մայիսի. /ԱՌԿԱ/. «Ռոստելեկոմը» հրավիրում է բոլոր ուսանողներին մասնակցելու «Նոր հնարավորություններ ուսանողների համար» ամենամյա նախագծին, հայտնում է ընկերության մամուլի ծառայությունը։
Ծրագիրը Հայաստանում իրականացվում է արդեն երրորդ անգամ և հնարավորություն է տալիս ուսանողներին ծանոթանալու «Ռոստելեկոմ» Հայաստանի գործունեությանը, անցնելու ինտերակտիվ ուսուցում 10 և ավելի թեմաների շուրջ (սկսած հաղորդակցությունից, մարքեթինգից, բրենդինգից, իրավական ձևակերպումներից, վաճառքների հմտություններից մինչև օպտիկա և ցանցային լուծումներ), առաջարկներ ներկայացնելու «Ռոստելեկոմի» գործունեության տարբեր ուղղությունների վերաբերյալ։
Ծրագիրը կմեկնարկի հունիսի 20-ին «Ռոստելեկոմ» Հայաստանի գլխամասային գրասենյակում։
Ուսանողները կարող են նաև իրենց լուծումներն առաջարկել ընկերության գործունեության տարբեր ուղղությունների վերաբերյալ, մասնակցել մի շարք թիմային մրցույթների, ձեռք բերել նոր ընկերներ։
Ծրագրի ավարտին մրցութային փուլում հաղթող ճանաչված մասնակիցը հնարավորություն կստանա եռամսյա վարձատրվող ուսուցում անցնելու իր նախընտրած ստորաբաժանման կազմում, իսկ ուսուցման ընթացքում դրական արդյունքներ արձանագրելու դեպքում՝ համալրելու «Ռոստելեկոմ» Հայաստանի անձնակազմի շարքերը:
Կրեատիվ մտածողությամբ, ճկունությամբ, թիմային ոգով, գիտելիքներով, արագ կողմնորոշվելու ունակությամբ աչքի ընկած ուսանողներին, ինչպես և նախորդ տարիներին, ևս կընձեռնվի ընկերության անձնակազմը համալրելու հնարավորություն:
Ընկերությունից հայտնում են, որ բոլոր մասնակիցները կգրանցվեն ընկերության աշխատակիցների ռեզերվում` որպես հնարավոր թափուր հաստիքների համալրման առաջնահերթ թեկնածուներ:
«Նոր հնարավորություններ ուսանողների համար» երրորդ ծրագրի հայտերի ընդունման վերջնաժամկետը մայիսի 31-ն է։ Մասնակցելու իրավունք կստանան հարցազրույցի փուլը հաղթահարած 25 ուսանողներ:
Մրցույթին կարող են մասնակցել հայսատանյան բուհերի բակալավրիատ 3, 4 կուրսի և մագիստրատուրայի ուսանողները, ընդ որում մասնակիցների մասնագիտության կամ ապագա որակավորման հետ կապված սահմանափակումներ չկան:
«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։
Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–
Ծանոթացեք լուրերին առաջինն ու քննարկեք դրանք մեր Telegram-ում
12:43 23.05.2017
