«Ռոստելեկոմը» հայտարարում է մրցույթ ճարտարապետության և շինարարության Հայաստանի ազգային համալսարանի ուսանողների համար
ԵՐԵՎԱՆ, 30 մարտի. /ԱՌԿԱ/. «Ռոստելեկոմը» տեղեկացնում է, որ Ճարտարապետության և շինարարության Հայաստանի ազգային համալսարանի Շրջանավարտների աջակցման և կարիերայի կենտրոնի, ինչպես նաև Կառավարման և տեխնոլոգիայի ֆակուլտետի հետ համատեղ հայտարարում է «Թվային և անալոգային էլեկտրոնիկա» և «Հեռահաղորդակցություն և հեռակառավարում» թեմաներով գիտաժողով–մրցույթ ֆակուլտետի 1-4-րդ կուրսերի և մագիստրատուրայի ուսանողների համար:
«Ռոստելեկոմի» մամուլի ծառայության հաղորդմամբ, մրցույթի լավագույն հոդվածներն ու աշխատանքները կարժանանան մրցանակների հայաստանյան «Ռոստելեկոմի» և Ճարտարապետության և շինարարության Հայաստանի ազգային համալսարանի կողմից:
Մասնակցության համար ուսանողներին անհրաժեշտ է հոդվածներն ու գիտական աշխատանքները (համաձայն որոշակի պահանջների) ներկայացնել Ինֆորմատիկայի, հաշվողական տեխնիկայի և կառավարման համակարգերի ամբիոն մինչև սույն թվականի ապրիլի 21-ը: Գիտաժողով-մրցույթի ավարտից հետո հոդվածները կտպագրվեն:
Լրացուցիչ հարցերի, հոդվածների ներկայացման պահանջների և մրցույթի անցկացման այլ մանրամասների համար մասնակիցները կարող են դիմել Ճարտարապետության և շինարարության Հայաստանի ազգային համալսարանիԿարիերայի կենտրոն կամ զանգահարել (010) 58-01-56 հեռախոսահամարով:
«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։
Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–
Ծանոթացեք լուրերին առաջինն ու քննարկեք դրանք մեր Telegram-ում
16:43 30.03.2017