Ռուսաստանում ՏՏ շուկան նվազել է 15%–ով. կանխատեսումն ուրախացնող չէ
ԵՐԵՎԱՆ, 13 մարտի. /ԱՌԿԱ/. Ռուսական ՏՏ շուկայի ծավալը 2014 թվականին նվազել է 15%–ով և կազմել 6.57 մլրդ դոլար։ Ռուբլու փոխարժեքով դիտարկելու դեպքում շուկան ավելացել է 2.2 տոկոսով, ինչը ռուսական արժույթի փոխարժեքի նվազման հետևանք է, հայտնում է Cnews.ru–ն` հղում անելով IDC–ին։
2014 թվականի օգոստոսին IDC–ի վերլուծաբանները դոլարային արտահայտմամբ շուկայի 4 տոկոսանոց աճ էին կանխատեսել 2014 թվականի արդյունքում։ Այդ կանխատեսումը հինված էր այն ենթադրության վրա, որ հետագայում աշխարհաքաղաքական հակամարտության զարգացում չի լինի, իսկ արևմտյան պատժամիջոցներն էլ չեն ընդլայնվի։
Ռուսական ՏՏ ծառայությունների առավել մեծ հատվածը համակարգային ինտեգրացումն է։ 2014 թվականին այն կազմել է ամբողջ շուկայի 42 տոկոսը։ Աութսորսինգային ծառայությունների ոլորտը աճել է գրեթե մինչև 18 տոկոս։ Աճն ապահովվել է այդ ծառայությունների աճի նվազման տեմպերով, հստակեցրել են փորձագետները։
IDC–ում կարծում են, որ 2015 թվականը ծանր կլինի ՏՏ մատակարարների համար։ Միաժամանակ վերլուծաբանների կանխատեսման մեջ նաև դրական կողմ կա` տեղեկատվական տեխնոլոգիաների սպառման և գնումների ոլորտում կատարված լուրջ փոփոխությունները կհանգեցնեն նրան, որ շուկայի որոշ դերակատարներ նոր հնարավորություններ կստանան։
«Ներկա տնտեսական անկումը հավանաբար ավելի շարունակական կլինի, քան 2008-2009 թվականներին։ Ճգնաժամը ՏՏ ծառայությունների այն մատակարարների համար է, որոնք կարող են օպերատիվ կերպով արձագանքել տնտեսական իրավիճակներին, օպտիմալացնել ծախսերը, վերակազմակերպել բիզնես–գործընթացները, ներգրավել բարձր որակավորում ունեցող ՏՏ–մասնագետների։ Այս մարտավարությունը կօգնի ոչ միայն հաղթահարել ճգնաժամը, այլև ավելացնել նրանց մասնաբաժինը շուկայում»,– ասել է IDC հետազոտությունների գծով մենեջեր Ալեքսանդր Պրոխորովը։
IDC–ի տվյալով` 2013 թվականին ռուսական ՏՏ շուկան դոլարային արտահայտմամբ աճել է մոտավորապես 8 տոկոսով և կազմել 7.7 մլրդ դոլար։ Միաժամանակ 2013 թվականին առավել մեծ աճ է գրանցվել աութսորսինգի հատվածում։ Ճգնաժամային 2009 թվականին ռուսական ՏՏ–ծառայությունների շուկան, ըստ IDC–ի, նվազել է 31.2 տոկոսով և կազմել 3.6 մլրդ դոլար։-0-
Ծանոթացեք լուրերին առաջինն ու քննարկեք դրանք մեր Telegram-ում
21:26 13.03.2015
