Samsung-ի բաժնետոմսերն արժեզրկվել են Apple-ի դեմ պատենտային վեճում կրած պարտության հետևանքով
ԵՐԵՎԱՆ, 27 օգոստոսի. /ԱՌԿԱ/. Samsung Electronics հարավկորեական ընկերության բաժնետոմսերը Սեուլի ֆոնդային բորսայում կայացած առուվաճառքների առաջին ժամերին նվազել են ավելի քան 7 տոկոսով: 2008թ.-ից ի վեր դա Samsung-ի գնանշումների ամենամեծ անկումն է, հաղորդում է Բի-բի-սի-ին: Փորձագետները բաժնետոմսերի արժեքի այդքան էական նվազումը բացատրում են Apple-ի դեմ պատենտային վեճում տարած պարտությամբ:
Ուրբաթ՝ օգոստոսի 24-ին, Կալիֆոռնիայի Դաշնային դատարանը վճռել է, որ Samsung-ը խախտել է Apple ընկերության մի շարք պատենտները և հարավկորեական ընկերությանը պարտավորեցրեց ամերիկյան մրցակցին վճարել 1,05 մլրդ դոլար փոխհատուցում, հաղորդում է РБК-ն:
Դատարանն ընդունեց, որ մի շարք արտադրանքներ ստեղծելիս հարավկորեական ընկերությունն անօրինական կերպով Apple-ի այնպիսի տեխնոլոգիաներ է օգտագործել, ինչպիսին են՝ bounce-back-ը և pinch-to-zoom-ը: Դատարանը նաև հաշվի առավ, որ Samsung-ը դիտավորյալ կրկօրինակել է իր սարքավորումների դիզայնը iPhone-ից և iPad-ից: Samsung-ի պատենտների խախտման հարցում Apple-ի մեղքը դատարանը չի ճանաչել:
Samsung-ի ներկայացուցիչները հայտնել են, որ դատարանի որոշումը կհարվածի ոչ միայն հարավկորեական ընկերությանը, այլ նաև ամերիկյան սպառողին: «Նա առավել վատ ընտրություն կունենա: Շուկայում քիչ նորարարություններ կներկայացվեն, իսկ գները կաճեն»,- հայտնել է Samsung-ի մամուլի քարտուղար Միրա Յանգը՝ ավելացնելով, որ այդ գործընթացն ընկերությունների իրավաբանական հակադրության վերջին խոսքը չէ: Նա հիշեցրել է, որ պատենտային վեճի լսումները շարունակվում են մի քանի երկրների դատարաններում:
Ինչպես նշում են փորձագետները, Կալիֆոռնիայի դաշնային դատարանի որոշումը չափազանց հաջող ելք է Apple ընկերության համար, որն արդեն սմարթֆոնների և պլանշետային համակարգիչների շուկայում առաջատարներից մեկն է: Սա նախադեպ է, որը հետագայում թույլ կտա Apple-ին դատի տալ բջջային սարքավորումների մյուս արտադրողներին, որոնք Android համակարգ են օգտագործում:
Նախկինում Սեուլի Կենտրոնական շրջանի դատարանը երկու ընկերություններին մեղավոր էր ճանաչել պատենտների խախտման մեջ՝ նրանց արգելելով վաճառել մի շարք սարքավորումներ, այդ թվում՝ iPhone 3GS, iPhone 4 (Apple) և Galaxy 2 (Samsung) սմարթֆոն: -0-
Ծանոթացեք լուրերին առաջինն ու քննարկեք դրանք մեր Telegram-ում
17:05 27.08.2012