Samsung և LG սմարթֆոնները կկարողանան լուսանցել աչքը
ԵՐԵՎԱՆ, 22 հունիսի. /ԱՌԿԱ/. Samsung և LG հարավկորեական ընկերությունները հետաքրքրվել են աչքի ծիածանաթաղանթի լուսանցման տեխնոլոգիայով, որը հետագայում ծրագրում են օգտագործել իրենց սմարթֆոններում, գրում է Vestifinance.ru–ն։
Այդ մասին տեղեկությունը հայտնվել է նրանից հետո, երբ ճապոնական Fujitsu–ն պաշտոնապես ծանուցել է աշխարհում առաջին սմարթֆոնը, որն օգտագործում է հենց այդպիսի լուսանցիչ։ Նոր սարքի առանցքային առանձնահատկությունն աչքի ծիածանաթաղանթի Iris Passport լուսանցիչն է, որը թույլ է տալիս ակտիվացնել սարքը միայն հայացքով։ Այն կարելի է օգտագործել նաև տարբեր սերվիսներում կամ հավելվածներում մուտքի իրավունքի կամ բջջային վճարումների հաստատման համար։
Ճյուղային իրազեկ աղբյուրների տեղեկացմամբ, այժմ LG–ն և Samsung–ն աշխատում են նմանատիպ տեխնոլոգիայի վրա, որը, ինչպես ակնկալվում է, կկիրառվի ընկերությունների թողարկած նոր սմարթֆոններում։ LG և Samsung` ծիածանաթաղանթի լուսանցմամբ առաջին սմարթֆոնները կարող են հայտնվել շուկայում արդեն հաջորդ տարի։
Ենթադրվում է, որ առաջիկայում այդ գործառույթը կփոխարինի դակտիլոսկոպիկ սարքերին, որոնք այժմ տեղադրվում են հիմնական սմարթֆոններում։ Այնուամենայնիվ, և մատնահետքերի լուսանցիչների, և ծիածանաթաղանթի լուսանցիչների նշանակությունն անվտանգության մակարդակի բարձրացումն է և սովորական գաղտնաբառերը կենսաչափական տվյալներով փոխարինելն է օգտագործողների հարմարության համար։
Հիշեցնենք, որ այս շաբաթ տեղեկատվական անվտանգությամբ զբաղվող NowSecure ընկերությունը լուրջ խոցելիություն է հայտնաբերել Samsung սմարթֆոններում։ Հաքերները հեշտությամբ կարող են 600 մլն սարքեր գրոհել, հայտնել են մասնագետները Լոնդոնում կայացած Black Hat համաժողովում։
NowSecure–ի ներկայացուցիչ Ռայան Վելթոնը հայտարարել է, որ Galaxy շարքի Samsung սմարթֆոնները չարագործների համար դուռ են բացել, որը թույլ է տալիս հաղորդող սարքերի, GPS-մոդուլի, տեսախցիկի և միկրոֆոնի հասանելիություն ստանալ, աննկատ տեղադրել վնասաբեր հավելվածներ, միջամտել այլ հավելվածների և օպերացիոն համակարգի աշխատանքին, «փախցնել» հաղորդագրությունները և գաղտնալսել զանգերը, ինչպես նաև լուսանկարների և տեսագրությունների հասանելիություն ստանալ։
Խոցելիությունը կապված է Samsung սմաթֆոնի վրա լռելյայն տեղադրված SwiftKey ստեղնաշարի ծրագրային ապահովման հետ։ Հարկ է նշել, որ անսարքությունը հայտնաբերվել է դեռևս 2014 թվականի նոյեմբերին, իսկ մի քանի ամիս անց Samsung–ը հայտնել է, որ վերացրել է այն։
NowSecure փորձագետները սակայն պնդում են, որ թերությունը չի վերացվել, և Samsung Galaxy սմարթֆոններն առաջվա պես ռիսկի խմբում են։ Որպես իր խոսքի ապացույց Ռայան Վելթոնը ներկայացրել է խոցելիությունը Samsung Galaxy S6 մոդելի օրինակով։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:58 22.06.2015