Սմարթֆոնին «սովորեցրել են» լիցքավորվել WI-FI–ի միջոցով

ԵՐԵՎԱՆ, 11 մայիսի. /ԱՌԿԱ/. Nikola Labs–ի ինժեներների ստեղծած սմարթֆոնի պատյանը շուտով կներկայացվի Kickstarter–ում։ Սարքը կկարողանան Wi-Fi–ի, LTE–ի և Bluetooth–ի նման ռադիոհաճախականության ազդակները փոխարկել փոփոխական հոսանքի` օգտագործելով էներգիա հավաքելու օրիգինալ սխեման, հաղորդում է hi-tech.mail.ru–ն։

Արդյունքում բջջային հեռախոսը կարող է լիցքավորվել ցանկացած անլար կապի գործողության գոտում։ Նման տեխնոլոգիա արդեն փորձել էր ստեղծել Lunecase նախագիծը, սակայն դա ընդամենը գեղեցիկ նախաձեռնություն էր ստացվել. սմարթֆոնից հավաքած էներգիան ծախսվում էր սարքի հետևի պանելի վրա հաղորդագրություններ ցուցադրելու համար։ Եվ եթե start-up ընկերությունը երկու օրում հավաքեց անհրաժեշտ 50 000 դոլարը, ապա Nikola Labs–ի հաջողության հարցում չարժե կասկածել։

Այս շաբաթ Nikola Labs–ը ներկայացրեց iPhone 6–ի համար նախատեսված առաջին պատյանը, որն օդից լիցքավորվում է էներգիայով։ Փորձագետները նշում են, որ պատյանը փոխակերպում է էներգիայի 90 տոկոսը, որը սմարթֆոնն արտադրում է բջջային կապի ազդանշանն ընդունելիս և հետ է վերադարձնում այն, ինչի հաշվին սարքը 30 տոկոսով ավելի երկար է աշխատում։

Nikola Labs–ի համահիմնադիր Ուիլ Զելը (Will Zell) լիցքավորվող պատյանը ներկայացնելիս նշել է, որ մշակման հիմքում ընկած է XIX դարում Նիկոլա Տեսլի և Հենրիխ Ռուդոլֆի բացահայտած տեխնոլոգիան։ Հաճախականություններով փոխանցվող էլեկտրամագնիսական էներգիան, որն ընկալում են շարժական սարքերը, թույլ է տալիս արդյունավետ կերպով լիցքավորել սարքը տանը, փողոցում, սրճարանում կամ գրասենյակում առանց լիցքավորման լարային սարքը վարդակ միացնելու։ Պատյանը ներառում է ալեհավաք, որը էներգիա հավաքելու համակարգի կենտրոնական բաղադրիչն է։ Այնուհետև էներգիան փոխակերպվում և փոխանցվում է սմարթֆոնի կուտակիչին։

Լիցքավորվող պատյանի մշակման գործին մասնակցում են Օհայոյի համալսարանի աշխատակիցները։ Նշենք, որ Օհայո նահանգի էլեկտրատեխնիկական լաբորատորիան համաշխարհային խոշորագույն կենտրոններից է, որը զբաղվում է օպտիկայի և ռադիոէլեկտրոնիկայի հետազոտմամբ։

Սպասվում է, որ լիցքավորվող պատյանի գինը չի գերազանցի 99 դոլարն այն ներդրողների համար, ովքեր միջոցներ կներդնեն Kickstarter–ում այն մշակելու համար։ Նշենք, որ Lunecase–ի մշակումը դեռևս սերիական արտադրության չի դրվել։ –0–

Ծանոթացեք լուրերին առաջինն ու քննարկեք դրանք մեր Telegram-ում

14:42 11.05.2015