Թողարկվել է «Մաքուր Հայաստան» ծրագրի բջջային հավելվածը

ԵՐԵՎԱՆ, 12 հոկտեմբերի. /ԱՌԿԱ/. Սկսել է գործել «Մաքուր Հայաստան» ծրագրի www.cleanarmenia.am կայքը, ինչպես նաև թողարկվել է բջջային հավելվածը՝ iOS և Android տարբերակներով, հայտնում է ծրագրի համակարգող, ՀՀ վարչապետի խորհրդական հասարակական հիմունքներով Մհեր Տերտերյանը:

Facebook սոցիալական ցանցում հասանելի է նաև «Մաքուր Հայաստան» խումբը, որն ունի շուրջ 1850 անդամ:

Բջջային հավելվածի կամ վեբ կայքի միջոցով օգտատերերը հեշտությամբ կարող են ներբեռնել աղբի կամ աղբաշատ վայրի լուսանկարները, որոնք անմիջապես հայտնվում են թվայնացված քարտեզի վրա՝ ֆիքսելով հասցեն և տեղը: Տվյալ տարածքը մաքրելուց հետո օգտատերը ստանում է համապատասխան հաղորդագրություն, որ տարածքը մաքուր է:

«Մենք հորդորում ենք մեր քաղաքացիներին ակտիվ մասնակցություն ցուցաբերել հասարակության և պետության համար այս կարևորագույն նախաձեռնությունում: Յուրաքանչյուրս կարող է իր լուման բերել մեր բակը, փոխոցը, քաղաքը ավելի մաքուր դարձնելու գործում», - ասել է Տերտերյանը:

Հինգշաբթի կառավարության նիստում ՀՀ վարչապետ Կարեն Կարապետյանն անդրադարձել է այդ ծրագրի շրջանակներում կատարվող աշխատանքներին և նշել է, որ «Մաքուր Հայաստան» ծրագրի շրջանակում վերջին ամիսներին իրականացվել է ծավալուն աշխատանք, կազմակերպվել է 2 համապետական շաբաթօրյակ և երկու լրացուցիչ համաքաղաքային շաբաթօրյակ Երևանում։

«Արդյունքում՝ 2017 թվականի հոկտեմբերի 3-ի դրությամբ արձանագրված 2029 աղբանոցներից մաքրվել կամ կոնսերվացվել են 1574-ը: Բոլոր մարզերում ստեղծվել են համապատասխան հանձնաժողովներ և աշխատանքային խմբեր, գործադիր իշխանության մարմիններում նույնպես նշանակվել են «Մաքուր Հայաստան» ծրագրի պատասխանատուներ: Մշակվել և Ազգային ժողով է ներկայացվել աղբահանության և սանիտարական մաքրման ոլորտի կարգավորմանն ու պատասխանատվության միջոցների կիրառմանն ուղղված օրենսդրական փաթեթը: Աղբահանության պայմանագրերի կնքման և վճարների հավաքագրման վերաբերյալ հանձնարարականի արդյունքում, արդեն իսկ կնքված պայմանագրերի թիվն ավելացել է երկու անգամ և կազմում է սուբյեկտների ընդամենը 25 տոկոսը, ինչպես նաև ավելացել են աղբահանության համար վճարումների ծավալները (առանց Երևանի) ընդամենը 51.2 տոկոսով»,– ասել է նա:

Վարչապետը տարածքային կառավարման և զարգացման նախարարին հանձնարարվել է ապահովել հոկտեմբերի 21-ին երրորդ համապետական շաբաթօրյակի կազմակերպմանն ուղղված նախապատրաստական աշխատանքների իրականացումը, ինչպես նաև հետևողական լինել իրականացվող ծրագրերի պատշաճ կատարման ու ժամանակացույցի առումով: -0-

Ծանոթացեք լուրերին առաջինն ու քննարկեք դրանք մեր Telegram-ում

17:42 12.10.2017