Ucom-ի աջակցությամբ՝ երկու վերանորոգված շարժակազմ և 4G+ ծածկույթ Երևանի մետրոպոլիտենում

ԵՐԵՎԱՆ, 28 դեկտեմբերի./ԱՌԿԱ/. Անցնող տարվա վերջին օրերին Ucom ընկերության աջակցությամբ Երևանի մետրոպոլիտենում երկու ամբողջովին վերանորոգված շարժակազմեր գործարկվեցին, հաղորդում է Ucom–ի մամուլի ծառայությունը։

Արտաքինից Ucom ընկերության գույներով բրենդավորված շարժակազմերից մեկում ներկայացված են հին և նոր Երևանի լուսանկարները:

«Վստահ եմ, որ երևանյան պատկերները հաճելի հիշողություններ կարթնացնեն ավագ սերնդի ներկայացուցիչների սրտերում, երիտասարդների հետաքրքրությունը կշարժեն ու կստիպեն հարցեր տալ ու պրպտել, փնտրել երևանյան պատմությունները, գնալ դրանց հետքերով, բացահայտել ջերմ ու բարի քաղաքի նույնքան ջերմ ու բարի բնակիչներին: Իսկ Ucom-ի բաժանորդներին առավել քան հաճելի կլինի երթևեկել մետրոյով, քանի որ այսօրվանից նաև երևանյան մետրոյում հասանելի կլինի Հայաստանում առաջին 4G+ ցանցը», - նշել է Ucom ընկերության տնօրեն Հայկ Եսայանը:

Ինչպես նշվում է հաղորդագրության մեջ, համաձայն Ucom ընկերության, ի դեմս տնօրեն Հայկ Եսայանի և Երևանի Մետրոպոլիտենի, ի դեմս տնօրեն Փայլակ Յայլոյանի, միջև դեկտեմբերի 28-ին կնքված համագործակցության հուշագրի Ucom ընկերությունը կշարունակի գլխավոր հովանավորի կարգավիճակով աջակցել գնացքների բազայի թարմացմանն ու արդիականացմանը: 

Կարեն Դեմիրճյանի անվան մետրոպոլիտենը հիմնվել է 1981 թ.-ին: Ներկայում Երևանում գործում է 10 կայարան: Բոլոր գծերի ընդհանուր երկարությունը կազմում է 13,4 կմ:

Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։ -0-

Ծանոթացեք լուրերին առաջինն ու քննարկեք դրանք մեր Telegram-ում

19:14 28.12.2016