Ucom–ն արդիականացնում է Հայաստանի հակակարկտային կայանների բջջային ապահովումը
ԵՐԵՎԱՆ, 6 մայիսի. /ԱՌԿԱ/. Ucom հայկական հեռահաղորդակցային ընկերությունը հանրապետության ԱԻՆ–ի աջակցության վերաբերյալ համաձայնագիր է ստորագրել։
Ինչպես հայտնում է Ucom–ի մամուլի ծառայությունը, փաստաթուղթը ստորագրել են Ucom–ի գլխավոր տնօրեն Հայկ Եսայանը և Հայաստանի արտակարգ իրավիճակների նախարար Դավիթ Տոնոյանը։
Համաձայն պայմանագրի՝ Ucom ընկերությունը արդիականացված երկքարտանի 2G և 3G հնարավորությամբ 380 մոդեմներ կտրամադրի Հայաստանի ամբողջ տարածքում տեղադրված ու գործող բջջային կապով աշխատող հակակարկտային կայաններին:
Վերազինումը թույլ կտա կրճատել տեխնիկական թերությունների թիվը, ինչպես նաև զերծ պահել համակարգը նախկինում արձանագրված խափանումներից։ Նոր մոդեմները, նախևառաջ, կտեղադրվեն ավելի ռիսկային համայնքներում։ Հակակարկտային կայանների արդիականացման արդյունքում համակարգի խափանման հավանականությունը գրեթե չեզոքացվում է՝ բարձրացնելով բնական աղետներին գյուղական տնտեսությունների դիմակայունության մակարդակը:
«Դեռ 5 տարի առաջ սկսված քննարկումներն այսօր տեսանելի արդյունք են տվել»,– ասաց Տոնոյանը` շնոևհակալություն հայտնելով համակարգին օժանդակելու համար։
Ucom–ի գլխավոր տնօրեն Հայկ Եսայանն իր հերթին նշեց, որ ընկերությունը մեծագույն պատրաստակամությամբ է արձագանքել գործակցելու առաջարկին` գյուղատնտեսության ոլորտի զարգացմանը խոչընդոտող օդերևութաբանական խնդիրները լուծելու նպատակով:
«Այժմ ուրախությամբ փաստում ենք, որ այս ներդրման արդյունքում ձեռքբերված մոդեմները թույլ կտան մեկի աշխատանքի ուշացման կամ խափանման պարագայում գործի դնել մյուսը և ժամանակին ուղարկել SMS-ները, որոնց օգնությամբ էլ գործարկվում են հակակարկտային կայանները», - ասել է Ucom ընկերության գլխավոր տնօրեն Հայկ Եսայանը:
Տարբեր տարիներին Հայաստանի տարածքում առատ կարկտի հետևանքով գյուղատնտեսությունը բազմիցս խոշոր կորուստներ է կրել։
Ucom (Universal Communications) հայկական ընկերությունը հիմնադրվել է 2007 թ.: Հանդիսանալով Հայաստանյան հեռահաղորդակցային շուկայի առաջատարներից մեկը, Ucom ընկերությունը առաջարկում է այս ոլորտում ծառայությունների լիարժեք շարք՝ գերարագ սիմետրիկ ինտերնետ, IP հեռուստատեսություն և ֆիքսված թվային հեռախոսակապ: Համագործակցելով Ericsson ընկերության հետ, Ucom-ը կառուցում է նոր սերնդի ամենամեծ օպտիկամանրաթելային ցանցը Հայաստանում: -0-
Ծանոթացեք լուրերին առաջինն ու քննարկեք դրանք մեր Telegram-ում
16:36 06.05.2017