Ucom–ն ու Nokia–ն համագործակցության պայմանագիր են ստորագրել Հայաստանում 5G ցանցի ստեղծման համար
ԵՐԵՎԱՆ, 10 փետրվարի․/ԱՌԿԱ/․ Ucom հայկական հեռահաղորդակցական օպերատորը պայմանագիր է ստորագրել Nokia ընկերության հետ, որը նախատեսում է Ucom–ի բազային և IP ցանցի ենթակառուցվածքի արդիականացում։
Պայմանագիրն ուղղված է ՀՀ–ում Ucom ցանցի 5G Ready և RAN-Radio Access network ծառայությունների ժամանակակից ծածկույթի ապահովմանը։ Դա թույլ կտա բարձրացնել բաժանորդների բջջային կապի հարմարավետությունն ու որակը՝ ապահովելով տվյալների փոխանցման արագությունն ու ավելացնելով թողունակությունը։ Պայմանագրի իրագործմամբ Ucom–ը կառաջարկի լայն հնարավորություններ ինչպես մասնավոր, այնպես էլ կորպորատիվ բաժանորդներին։
Ucom–ը, օգտագործելով ոլորտի առաջատար MediaKind–ի նորագույն տեխնոլոգիաները, կապահովի որակապես նոր հեռուստատեսություն, այդ թվում ՝ տարբեր հոսքային սարքերով OTT (Over The Time media system), UHD (Ultra High Definition television) ալիքներով և շուրջօրյա սպասարկմամբ։
Ինչպես հայտարարեց Ucom–ի գլխավոր տնօրեն Ռալֆ Յիրիկյանը, ընկերությունը հայտարարում է նոր մեկնարկի և 5G ցանցի կառուցման մասին։
«Կլինի նոր ապագա հեռահաղորդակցության ոլորտում, կխթանվեն զարգացումն ու տեխնոլոգիական մրցակցությունը։ Ucom–ը ցանկացավ կատարել համարձակ քայլեր, ներգրավել ներդրումներ բոլոր ուղղություններով, զարգացնել ցանցը, ներկայացնել 5G տեխնոլոգիան։ Մենք որոշեցինք սկսել Հայաստանի մարզերից», – ասաց նա։
Յիրիկյանը նշեց, որ այս փոփոխությունը կտա բացառիկ փորձ և կապահովի որակ ընկերության բաժանորդների համար։
«Մենք խոսում ենք ոչ միայն բջջային կապի, այլև ֆիքսված ցանցի, նոր հեռուստատեսային հարթակի մասին, որը կտրամադրի հետաքրքիր և որակյալ ծառայություններ մեր բաժանորդների համար», – ընդգծեց նա։
Ucom–ի գլխավոր տնօրենն ուշադրություն դարձրեց այն փաստին, որ ընկերությունը կփորձի նախօրոք տեղեկացնել բաժանորդներին այն դեպքում, եթե առաջանան կապի խափանումներ իրականացվող աշխատանքների պատճառով։
Եվրոպայում Nokia–ի բջջային կապերի հարցերով փոխնախագահ Փիթեր Վուկովիցն իր հերթին նշեց, որ Nokia–ի և Ucom–ի գործընկերության կարևորությունը կայանում է համատեղ աշխատանքում հարթակի ստեղծման վրա, որպեսզի թվայնացումը հնարավոր լինի Հայաստանի, հասարակության և բիզնեսի համար երկրում և նրա սահմաններից դուրս: Նա նշեց, որ բանակցություններն ընկերությունների միջև տևել են 2 տարի։
«Այսօր, երբ մեր միջև հաստատված է համագործակցություն, մեր խնդիրն է ամրապնդել Ucom–ն ու պատրաստել այն 5G ցանցին և դրա լուծումներին», – ասաց նա։
Եվրոպայում, Միջին Արևելքում, Աֆրիկայում և Ասիական–խաղաղօվկիանոսյան տարածաշրջանում MediaKind ընկերության վաճառքների գծով փոխնախագահ Վիետ Նուեն Կաոն իր հերթին ընդգծեց, որ Ucom–ի հետ համագործակցությունը կարևոր է MediaKind–ի հետ, քանի որ դինամիկ հայկական շուկայում կարելի է իրականացնել նորարարություններ, փորձել նոր տարբերակներ և ստանալ նոր փորձ։
«Հայկական բաժանորդների համար հեռուստատեսության լավագույն փորձի ապահովման նպատակով մենք սկսում ենք գործակցություն այնպիսի դինամիկ օպերատորի հետ, ինչպիսին Ucom–ն է և ոլորտի այնպիսի փորձառու ընկերության հետ, ինչպիսին MediaKind-ն է», – ասաց նա։
Ucom–ն առաջարկում է Հայաստանում ամենաարագ ֆիքսված և բջջային կապի ծառայությունները։ Ընկերությունը բացարձակ առաջատարն էր IPTV–ի և ֆիքսված համացանցի ծառայությունների տրամադրման հարցում և զբաղեցնում է առաջատար դիրքեր Հայաստանի շարժական համացանցի շուկայում։ 4G+ և սեփական օպտիկամանրաթելային ցանցի արդիականացման, համապատասխան բարձրագույն միջազգային չափորոշիչների շնորհիվ Ucom–ը տրամադրում է ֆիքսված և բջջային կապի ծառայությունների համալիր փաթեթ ավել քան 700 հազար բաժանորդի։
Nokia Corporation–ը ֆիննական անդրազգային ընկերություն է, այն արտադրում է հեռահաղորդակցական սարքավորումներ բջջային, ֆիքսված, լայնաշերտ և IP ցանցերի համար։ Ընկերությունը 2000–ականներից առաջատարներից էր բջջային հեռախոսների համաշխարհային շուկայում։–0–
Ծանոթացեք լուրերին առաջինն ու քննարկեք դրանք մեր Telegram-ում
17:00 10.02.2024