Ucom–ն իր բաժանորդներին նոր օնլայն ծառայություն է ներկայացրել
ԵՐԵՎԱՆ, 10 մարտի. /ԱՌԿԱ/. Ucom ընկերությունն իր բաժանորդներին նոր օնլայն ծառայություն է ներկայացրել, որը թույլ է տալիս բաժանորդներին իրենց տնից կամ աշխատավայրից արագ կատարել իրենց անհրաժեշտ գործողությունները։
Ընկերության մարկետինգի գծով մասնագետ Գոռ Քրոյանի խոսքերով` նոր օնլայն ծառայությունը, որն առաջինն է Հայաստանում, թույլ կտա Ucom–ի բաժանորդներին անձնական կաբինետի միջոցով ընկերության կայքում կնքել կամ վերակնքել պայմանագրեր, փոխել կամ թարմացնել ընկերության ծառայությունների փաթեթը, փոխել սակագնային պլանը, ակտիվացնել Wi-Fi ծառայությունը, միացնել լրացուցիչ ծառայություններ։
«Եթե բաժանորդը օգտվում է UNET, UTV կամ Uphone ծառայություններից, ապա նա կարող է առանց վաճառքի գրասենյակ այցելելու փոխել դրանք Triple Play (3–ը 1–ում) ծառայության», – նշեց Քրոյանը։
«Մեր ընկերության ցանկացած գրանցված հաճախորդ հնարավորություն ունի անգամ շարժական սարքերի միջոցով փոխել սակագնային պլանը, կառավարել ինտերնետին և հեռուստատեսությանը վերաբերող հարցերը», – ասաց Ucom–ի տնօրեն Հայկ Եսայանը։
Նրա խոսքերով` օնլայն ծառայության շնորհիվ Ucom ընկերությունը մտադիր է ընդլայնել իր գործունեությունը ինտերնետային ծառայությունների շուկայում հաճախորդների ավելի արագ և հարմարավետ սպասարկման համար, ինչը հնարավորություն կտա բաժանորդներին տնտեսել ժամանակ և օգտվել ծառայություններից առանց տնից և գրասենյակից դուրս գալու։
«Յուրաքանչուր գրանցված հաճախորդ կկարողանա ավելացնել նոր ծառայություններ նոր հասցեով։ Այսինքն, եթե բաժանորդը չի օգտվում ծառայություններից կոնկրետ հասցեում, ապա նա հնարավորություն ունի նշել հասցեն օնլայն ռեժիմում, ինչից հետո մի քանի օրվա ընթացքում կկատարվեն աշխատանքներ և կմիացվեն կոնկրետ ծառայությունները», – նշեց Եսայանը։
Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջկացությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։–0–
Ծանոթացեք լուրերին առաջինն ու քննարկեք դրանք մեր Telegram-ում
14:45 10.03.2015
