Ucom-ը 100% կրթաթոշակի հավաստագիր է տրամադրել Շիրակացու ճեմարանի սանին

ԵՐԵՎԱՆ, 3 ապրիլի. /ԱՌԿԱ/. Ucom ընկերությունը 100% կրթաթոշակի հավաստագիր է տրամադրել Շիրակացու ճեմարանի սանին, հաղորդում է ընկերության մամուլի ծառայությունը:

Ինչպես հայտնեցին ընկերությունից, ապրիլի 1-ին Շիրակացու ճեմարանում մեկնարկել է «Շիրակացու օրեր» փառատոնը, որը ազդարարվում է տասներորդ դասարանցիների` անհատական նախագծերի ներկայացմամբ:  

Փառատոնի բացման արարողության ժամանակ հավաստագրեր են հանձնվել Դիպլոմային ծրագրով սովորող` կրթաթոշակի արժանացած սաներին:

Հաղորդագրության համաձայն, մեկ տարի շարունակ տասներորդ դասարանի սաները ընտրել, ուսումնասիրել, հետազոտել են իրենց համար կարևոր մեկ թեմա, որն առավել հոգեհարազատ է իրենց, բավարարում է սեփական հետաքրքրությունները և հնարավորություն է տալիս նորարար լինել այդ թեմայի շրջանակում:

Անհատական նախագիծը MYP ծրագիրն ավարտող սաների վերջնական հետազոտական աշխատանքն է և միաժամանակ հիմքն այն մյուս բոլոր աշխատանքների, որոնք նրանք դեռ պետք է իրականացնեն հետագայում` թե ճեմարանում, թե ԲՈՒՀ-ում:

Անհատական նախագծերի ներկայացումը նշանավորվել է կարևոր նորությամբ. Ճեմարանը սահմանել է ճեմարանական կրթաթոշակ Դիպլոմային ծրագրում սովորողների համար, որից ամենամեծի հովանավորությունը ստանձնել է Ucom ընկերությունը:

100% կրթաթոշակի արժանացած սան Արմինե Կարապետյանին հանձնելով այդ մասին վկայող հավաստագիրը` Ucom ընկերության գլխավոր տնօրեն Հայկ Եսայանն ընգծել է, որ քանի որ Ucom ընկերությունն իր կորպորատիվ սոցիալական պատասխանատվության շրջանակում առանձնանում է հենց կրթական նախագծերում իր ներդրումներով, ընկերությունը չի կարող անմասն մնալ այս միջոցառումից:

«Արմինե Կարապետյանին հանձնելով 100% կրթաթոշակի հավաստագիր` մենք ևս մեկ անգամ ուզում ենք ընդգծել, որ, անկախ երեխայի ծնողների ու հարազատների ֆինանսական հնարավորությունից ու բնակության վայրից, խելացիությունը, լավ առաջադիմությունը, ուշիմությունը, կրթվելու ցանկությունը, նպատակասլացությունը միշտ հատուցվում է: Սա մեծ աշխարհում հայտնվելու լավ հիմք է ու մեծ աշխարհին՝ ապագայում օգտակար լինելու փայլուն հնարավորություն», - ասել է Եսայանը:

Տասներորդ դասարանից հետո ճեմարանական սաները կարևոր որոշման առջև ենկանգնում. ընտրել հետագա կրթությունը ազգային ծրագրով, թե համարձակվել«անցնել ռուբիկոնն» ու դիմել Դիպլոմային ծրագրով ուսումը շարունակելու:

Ավագ դպրոցի տնօրեն Զարուհի Ղալթախչյանի խոսքով, այս կարևոր քայլից առաջ, Ճեմարանի տնօրինությունը, խրախուսում է նրանց լինել համարձակ և կատարել վճռորոշ քայլը` առաջնորդվելով ոչ թե գումարային, այլ գիտելիքների և ինքնավստահության վրա հիմնավորված որոշմամբ` կարևոր ողջ հետագա կյանքի համար:

«Մինչ այժմ Դիպլոմային ծրագրում սովորելու հնարավորություն ունեցել են միայն այն սաները, ովքեր կարողացել են վճարել ուսման համար սահմանված գումարը, այժմ կրթաթոշակների առկայությամբ հնարավոր դարձավ իրականացնել դա նաև նրանց համար, ովքեր վճարունակ չեն, բայց մեծ ներուժ ու ցանկություն ունեն` ստանալու միջազգային մակարդակի կրթություն»,- ասել է նա:

Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։ -0-

Ծանոթացեք լուրերին առաջինն ու քննարկեք դրանք մեր Telegram-ում

15:27 03.04.2017