Ucom-ը կշարունակի ներդրումներ կատարել սեփական ցանցի արդիականացման նպատակով

ԵՐԵՎԱՆ, 14 փետրվարի. /ԱՌԿԱ/. Ucom ընկերությունը մտադիր է 16.6 մլրդ դրամ ներդնել ցանցի արդիականացումն ավարտին հասցնելու համար, հայտնում է ընկերության մամուլի ծառայությունը։  

Նախօրեին ընկերության ղեկավար կազմն ընկերության գլխավոր տնօրեն Հայկ Եսայանի գլխավորությամբ հանդիպել է ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի և նախարարի տեղակալ Բորիս Դեմիրխանյանի հետ:

Այցի ընթացքում քննարկվել են հեռահաղորդակցության ոլորտի խնդիրներ։  Ucom ընկերության գլխավոր տնօրենը ներկայացրեց նախորդ տարվա տեխնիկական վերազինման արդյունքները, որոնց ընդհանուր արժեքը կազմել է 28 մլրդ դրամ և նշել է, որ այս տարի ևս 16.6 մլրդ դրամ կներդրվի ցանցի արդիականացումն ավարտին հասցնելու համար:

Եսայանը գոհունակությամբ արձանագրեց հայկական ընկերությունների հետ սերտորեն համագործակցելու փաստը, մասնավորապես՝ ծրագրային փաթեթների, բջջային հավելվածների, սարքավորումների նախագծման ու ստեղծման ուղղությամբ:

Ներկայացվեց ընկերության գործունեությունը կորպորատիվ սոցիալական պատասխանատվության շրջանակներում, մասնավորապես՝ կրթական այնպիսի նախագծերի, ինչպիսիք, օրինակ, «Արմաթ» ինժեներական լաբորատորիաներն են, որտեղ դպրոցահասակ երեխաները սովորում են ծրագրավորել հանրահայտ Մասաչուսեթսի Տեխնոլոգիական ինստիտուտի (MIT) կողմից մշակված և կիրառվող Scratch ծրագրով:

Նշվեց նաև, որ Apple ընկերության հետ գործակցության պայմանագրի արդյունքում Հայաստան ներկրվող սարքավորումներն արդեն կունենան հատուկ կոդ, որով հնարավոր կլինի տարբերակել ընկերության կողմից անմիջապես հայաստանյան սպառողի համար արտադրված ապրանքատեսակները:

Ucom-ի գլխավոր տնօրեն Հայկ Եսայանը զրույցի ավարտին նշեց, որ հեռահաղորդակցության շուկայի ընդհանուր անկմանը զուգահեռ, այնուամենայնիվ, ճիշտ է համարում Ucom ընկերության՝ սեփական OTT հավելվածներ ստեղծելու ուղղությամբ արվող քայլերը, որոնցից են, օրինակ, շարժական հեռուստատեսությունը, U!Pay վճարային համակարգը և այլն:

Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։ -0-

Ծանոթացեք լուրերին առաջինն ու քննարկեք դրանք մեր Telegram-ում

12:06 14.02.2017