Ucom–ը պատրաստվում է ծառայություններ տրամադրել բջջային կապի բնագավառում. Մամուլի ծառայություն
ԵՐԵՎԱՆ, 24 հուլիսի. /ԱՌԿԱ/. Ucom–ը պատրաստվում է ծառայություններ տրամադրել բջջային կապի բնագավառում, «ԱՌԿԱ» գործակալությանը հայտնեց ընկերության PR–մասնագետ Նաիրա Կարմիրշալյանը` մեկնաբանելով Ucom ընկերության կողմից Orange Արմենիա ընկերության 100% բաժնետոմսերի գնման շուրջ բանակցությունները։
«Բանակցությունների փուլը դեռ նոր է սկսվել, և թե ինչպես այն կավարտվի, չենք կարող նախօրոք կանխագուշակել: Թե ինչ տեղի կունենա շուկայում, այդ մասին կան բազում վերլուծություններ: Մենք կարող ենք նշել, որ «Յուքոմն» իր բաժանորդներին առաջարկում է գերժամանակակից և որակապես տարբերվող կոնվերգենտ ծառայություններ, որի մի մասը կկազմի նաև բջջային կապի տրամադրումը՝ այսպիսով համալրելով ծառայությունների բազմազանությունը: Մենք կշարունակենք տրամադրել որակյալ ծառայություն IP հեռուստատեսության, լայնաշերտ ինտերնետի, ֆիքսված հեռախոսակապի, իսկ բանակցությունների դրական ավարտի դեպքում նաև բջջային կապի բնագավառում»,– ասաց Կարմիրշալյանը:
«Յուքոմ» (Universal Communications, ունիվերսալ կապ) ընկերությունը հիմնադրվել է 2007 թվականին և զբաղվում է հեռահաղորդակցային ծառայությունների մատուցմամբ։ Ericsson–ի օժանդակությամբ, ընկերությունը ստեղծել է լայնաշերտ հասանելիության ցանց` մատուցելով ինտերնետ, IP-հեռուստատեսության և ֆիքսված հեռախոսակապի ծառայություններ: Ericsson-ի հետ համատեղ ընկերությունը ստեղծել է լայնաշերտ հասանելիության ցանց՝ տրամադրելով ինտերնետի, IP-հեռուստատեսության և հեռախոսային ծառայություններ: –0–
Ծանոթացեք լուրերին առաջինն ու քննարկեք դրանք մեր Telegram-ում
22:04 24.07.2015